ԱԺ ՀՀԿ խմբակցության պատգամավոր Մարգարիտ Եսայանը «Առաջին լրատվական»-ի հետ զրույցում գնահատելով սեպտեմբերի 18-ին ՀՀ տարբեր մարզերում անցկացված ՏԻՄ ընտրությունները և ՀՀ վարչապետի փոփոխությունը՝ ասաց. «Ես կարծում եմ՝ այս փոփոխությունները պայմանավորված էին և՛ վիճակագրությամբ, և՛ այն արդյունքներով, որ մենք ունեինք, նաև՝ հասարակության պահանջով: Քանի որ նոր վարչապետն ունի երկրի նախագահի լիակատար ազատությունը, հույս ունեմ, որ այս նշանակումը որոշ ժամանակ անց իր պտուղները կտա»:
Մարգարիտ Եսայանը վստահություն հայտնեց, որ Կարեն Կարապետյանը կհավաքի պրոֆեսիոնալների կառավարություն. «Կարծում եմ, որ և՛ մեր կառավարությունում, և՛ Ազգային ժողովում, և՛ մեր իշխանական ու ընդդիմադիր դաշտում շատ մեծ թարմության հոսանք է հարկավոր, որովհետև կան հոգնած դեմքեր, նույնիսկ կան մարդիկ, որ իրենք իրենցից էլ են հոգնել: Ես գրեթե վստահ եմ, որ այդ թարմությունը Կարեն Կարապետյանը կբերի»:
Ինչ վերաբերում է ՏԻՄ ընտրություններում գրանցված արդյունքներին, ՀՀԿ-ական պատգամավորն ուրախալի համարեց այն փաստը, որ ՏԻՄ ընտրություններում բացարձակ մեծամասնություն չկա. «Այսինքն՝ այնպես չէ, որ Հանրապետականը բոլոր համայնքներում միանշանակ հաղթանակ է տարել: Սա լավ շանս է՝ խորհրդարանական ընտրություններին նույն ակտիվությամբ մասնակցելու համար»:
Տիկին Եսայանը անհամեմատելի է համարում 90-ական թվականների և այսօր անցկացվող ընտրությունները, քանի որ այժմ, նրա խոսքով, կատարվել են մեծ փոփոխություններ, «թեև այդ փոփոխությունների տեմպերն ինձ չեն բավարարում, որովհետև ես մաքսիմալիստ եմ»: Իսկ հոկտեմբերի 2-ին Գյումրիում և Վանաձորում անցկացվելիք ընտրությունները մեր զրուցակիցը համարում է կարևոր փորձաքար մեր պետության համար, «որովհետև դրանք առաջինն են, որ պիտի անցկացնենք նոր Սահմանադրության պայմաններում»:
«Մենք այլևս նահանջելու տեղ չունենք, պիտի առաջ գնանք, ընդ որում՝ տեսանելի քայլերով»,- իր կարծիքը հայտնեց ՀՀԿ-ական պատգամավորը:
