Ոչ թե Ֆրանսիայի Սենատն է մերժել մարդկության դեմ կատարված հանցագործությունների՝ ներառյալ Հայոց ցեղասպանության ժխտումը քրեականացնող օրինագիծը, այլ Սենատի հանձնաժողովներից մեկը՝ Հավասարության և քաղաքացիության հատուկ հանձնաժողովը, որը պիտի ուսումնասիրեր օրինագիծը, որոշում է կայացրել օրինագծի վերաբերյալ: Օրինագիծը մնում է Սենատի օրակարգում և քվեարկության է դրվելու հոկտեմբերի 18-ին կայանալիք նիստում:
«Առաջին լրատվական»-ին այսպիսի պարզաբանում տվեց Ֆրանսիայի հայկական կազմակերպությունների համակարգող խորհրդի (CCAF) համանախագահ Արա Թորանյանը՝ մեկնաբանելով մամուլում տարածված վերջին տեղեկությունը այս թեմայով:
«Համենայնդեպս, վերջին խոսքը մնում է ֆրանսիական խորհրդարանին՝ Ազգային ժողովին, որն արդեն քվե է տվել՝ 100-ից 100: Օրենքը պիտի գա Ազգային ժողով, և Ազգային ժողովը վերջին խոսք պիտի ունենա: Սենատը պիտի քվեարկի հոկտեմբերի 18-ին: Այդ փոքրիկ խումբը, որը ստուգում էր օրենքը, հայտարարեց, որ ինքը համաձայն չէ, բայց վերջին խոսքը պիտի ասի ֆրանսիական Ազգային ժողովը»,- մեկնաբանեց Արա Թորանյանը:
Մեր զրուցակցի համոզմամբ՝ Սենատի հանձնաժողովի այդ որոշումը Թուրքիայի ակնհայտ ճնշման հետևանք է, բայց դա չի նշանակում, որ թուրքերը հաջողության կհասնեն այս հարցում:
Արա Թորանյանը պահպանում է հույսը, որ օրինագիծն, ամեն դեպքում, կընդունվի՝ ասելով, որ հանձնաժողովի այդ որոշումը չի նշանակում, թե ամեն ինչ կորցրել ենք:
«Հույս կա, որ Սենատը կընդունի հոկտեմբերի 18-ին, և նույնիսկ եթե չընդունի, Ազգային ժողովը, որն արդեն տվել է իր քվեն, իր խոսքը պիտի ունենա»,- նշեց Արա Թորանյանը՝ ավելացնելով, որ խորհրդարանի կողմից օրինագծի ընդունման դեպքում այն պիտի հաստատվի նաև Ֆրանսիայի Սահմանադրական խորհրդի կողմից:
Հիշեցնենք, որ Ֆրանսիայի խորհրդարանի ստորին պալատը՝ Ազգային ժողովը, հուլիսի 1-ին միաձայն կողմ էր քվեարկել մարդկության դեմ գործած հանցագործությունների ժխտումը Ֆրանսիայում քրեականացնող օրենքի նախագծի ընդունմանը: «Հավասարություն և քաղաքացիություն» կոչվող օրենքի նոր փոփոխությամբ նախատեսվում է մարդկության դեմ գործած հանցագործությունները հերքելու համար սահմանել մեկ տարի ազատազրկում և 45 000 եվրո տուգանք:
Ի տարբերություն Ցեղասպանությունը քրեականացնող նախորդ օրինագծի, որը մերժվեց Սահմանադրական դատարանի կողմից, այս նախագիծը ներկայացրել է Ֆրանսիայի կառավարությունը. Հայոց ցեղասպանության հերքումը քրեականացնող օրենքի ընդունումը նախագահ Ֆրանսուա Օլանդի նախընտրական խոստումներից մեկն էր:
