Թուրքական Zaman թերթի փոխանցմամբ, Շվեդիայի խորհրդարանի խոսնակ Պեր Վեստերբերգը 8 քաղաքական կուսակցությունների խորհրդարանական խմբակցությունների փոխնախագահների հետ ժամանում է Թուրքիա:
Պատվիրակության կազմում է նաև ծագումով թուրք, «Կանաչների» կուսակցության խորհրդարանական խմբակցության փոխնախագահ Մեհմեդ Քափլանը: Այցը կայանալու է մայիսի 23-24-ին:
Թուրքիայում Վեստերբերգը հանդիպումներ է ունենալու նախագահ Աբդուլլահ Գյուլի, վարչապետ Ռեջեփ Թայիփ էրդողանի և Թուրքիայի Ազգային մեծ ժողովի (ԹԱՄԺ) նախագահ Մեհմեդ Ալի Շահինի հետ:
Թուրքական այցից առաջ Վեստերբերգը նշել է. «Մեզ համար Թուրքիան շատ կարևոր գործընկեր է, քանի որ երկու երկրների միջև ապրանքաշրջանառությունը շարունակ աճում է, զբոսաշրջությունը նույնպես կարևոր տեղ է գրավում երկու երկրների հարաբերություններում: Բացի այդ, մեր երկրում բնակվում են զգալի թվով թուրքական ծագում ունեցող անձինք»:
Հիշեցնենք, որ նախորդ տարվա մարտի 11-ին Շվեդիայի խորհրդարանը` Ռիկսդագը, վեցժամյա քննարկումներից հետո 1 ձայնի առավելությամբ (131 կողմ, 130 դեմ) քվեարկեց Հայոց ցեղասպանությունը ճանաչող բանաձևի օգտին:
Դրանից անմիջապես հետո «խորհրդատվության նպատակով» Անկարա հետ կանչվեց Շվեդիայում Թուրքիայի դեսպան Զերգյուն Քորութուրքը:
Փաստորեն, շվեդական պատվիրակության առաջիկա այցը կհանդիսանա նախորդ տարվա իրադարձություններից հետո շվեդական առաջին բարձր մակարդակի այցը Թուրքիա:
