Կարեն Կարապետյանը սեպտեմբերի 15-ի կառավարության իր առաջին նիստը փորձել է դարձնել հնարավորինս հիշարժան ու դիտարժան, և դա նրա մոտ, իհարկե, ստացվել է:
Նախ՝ նա հանձնարարել է սկսել քայլեր գազի և էլեկտրաէներգիայի սակագները վերանայելու ուղղությամբ, հետո դաշնակցական նախարար Արծվիկ Մինասյանին մեղադրել է բիզնեսի հանդեպ ոչ բավարար հոգատարություն ցուցաբերելու մեջ, մշակույթի նախարար Հասմիկ Պողոսյանին և մյուս նախարարներին հանձնարարել է երկար-բարակ չխոսել և զեկույցները լակոնիկ ներկայացնել:
Ինչպես ասում են, նոր վարչապետը փորձել է իր դերի մեջ մտնել շռնդալից կերպով՝ ըստ ամենայնի որոշակի հետևություններ անելով նախորդ օրը իր խորհրդարանական բեմելից, որտեղ նա խոսել էր կախարդական փայտիկի բացակայության և արագ փոփոխությունների հույս չունենալու մասին:
Ամենայն հավանականությամբ, Կարեն Կարապետյանը արձանագրել է իր այդ մուտքի ձախողվածությունն ու վրիպումը՝ փորձելով այն ուղղել արդեն սեպտեմբերի 15-ի կառավարության նիստում: Չի բացառվում նաև, որ գործին միջամտել է Սերժ Սարգսյանը՝ Կարեն Կարապետյանին հորդորելով հանրությանը փոփոխությունների հույսեր տալ, ոչ թե խորհուրդ տալ հույսը կտրել արագ փոփոխություններից: Ի վերջո՝ Կարեն Կարապետյանի նշանակումը Սարգսյանը կատարել է հենց այդ ակնկալիքով, որպեսզի թեթևացնի լարվածությունը 2017 թվականի ընտրություններից առաջ, ոչ թե խորացնի այն:
Կարապետյանի փոփոխությունը մեկ օրվա կամ մեկ գիշերվա ընթացքում ակնհայտ է: Մյուս կողմից՝ նա ակնհայտ է դարձրել այն, որ ներկայիս կառավարությունը չի համարում իրենը: Այստեղ, իհարկե, զարմանալի ոչինչ չկա, քանի որ արդեն իսկ ըստ էության ազդարարված են մի շարք նախարարների փոփոխություններ: Սակայն խնդիրն այն է, որ ընդգծելով ներկայիս կառավարության և իր, այսպես ասած, տարբեր դիրքերը՝ Կարեն Կարապետյանը միգուցե ակնարկել է, որ դեռևս բոլորովին պարզ չեն այդ փոփոխությունները, դրանց այսպես ասած՝ վերջնական պատկերը, և այս առումով որևէ նախարար չի կարող երաշխավորված համարել իր տեղը նոր կառավարությունում:
Այս ակնարկն, իհարկե, արդիական է այն խոսակցությունների կամ տեղեկությունների ֆոնին, որ շրջանառվում են տարբեր լրատվամիջոցներում, տարբեր նախարարների և նրանց հետևում կանգնած քաղաքական կամ ներիշխանական թևերի և ուժերի մասին:
Կարեն Կարապետյանը կառավարության իր առաջին նիստում ցուցաբերելով նմանօրինակ բավական ագրեսիվ և նախահարձակ ոճ՝ այդպիսով պարզորոշ դրսևորել է, որ կառավարության ձևավորման գործընթացը ոչ միայն ավարտված չէ, այլև գտնվում է ակտիվ փուլում, և ոչ ոք չի կարող ոչ մի երաշխիք ունենալ իր տեղը պահելու մասով, եթե անգամ մինչ այժմ ստացել է որոշակի երաշխիքներ: Այլ կերպ ասած՝ Կարեն Կարապետյանի դրսևորումները ըստ էության ոչ միայն մենեջերական, այլ նաև քաղաքական ենթատեքստ ունեցող են, և Կարապետյանն ակնարկել է, որ ամենևին չի պատրաստվում անվերապահորեն ընդունել կամ անվերապահորեն համակերպվել իր թիկունքում քաղաքական համաձայնությունների հետ:
Իհարկե, այլ հարց է, թե որքանով նրան կհաջողվի ազդեցություն ունենալ կամ դիմադրել այդ գործընթացներում՝ չունենալով սեփական քաղաքական թիմը կամ բևեռը իշխանական համակարգում:
Լուսանկարը՝ Photolure-ի
