«Առաջին լրատվական»- ի հետ զրույցում տնտեսագետ Արտակ Մանուկյանը կարծիք հայտնեց, որ վարչապետի փոփոխության, նոր վարչապետի նշանակման որոշումը կայացվել է վաղուց, և հուլիսյան ԱՎԾ ցուցանիշներն էլ այդ ֆոնի վրա պատահական չեն, որ իբրև թե հուլիսին անկում գրանցվեց և նաև դրանով պայմանավորված իրականացվեց այս փոփոխությունը:
Տնտեսագետի հավաստմամբ՝ տարատեսակ փաստաթղթեր կան, որոնք փաստում են, որ մեր պետական ապարատը բավականին ուռճացված է: Արտակ Մանուկյանը հավաստիացրեց, որ առկա տնտեսությունից դեպի ստվեր ներհոսում է 1,5-2 մլրդ դոլար:
Փորձագիտական ուսումնասիրություններից ելնելով՝ տնտեսագետը կարծիք հայտնեց, որ երեք ոլորտներում չարաշահումներ են եղել: Լինելով պետգնումների փորձագետ, Արտակ Մանուկյանը նշել էր, որ 2,5 մլն դոլարի պատվաստանյութ է ձեռք բերվել Քննչական կոմիտեի ղեկավար Աղվան Հովսեփյանի որդուն պատկանող ընկերության միջոցով. տնտեսագետը ներկայացրեց ուսումնասիրությունների արդյունքները՝ որոնց համաձայն՝ միլիոնավոր դոլարներ է յուրացվել պետգնումներով: Ուռճացվել են պատվաստված անձանց թվերը, պատվաստանյութի ձեռքբերման գները և այլն:
Արդյո՞ք խոշոր կոռուպցիոն ձկներին բացահայտելու հարցում նորանշանակ վարչապետը կարող է դառնալ փոփոխության խորհրդանիշ՝ հաշվի առնելով նաև այն հանգամանքը, որ ժամանակին նաև նրա ընտանիքի անդամների մասին կոռուպցիոն ռիսկերի հետ կապված հրապարակումներ են եղել. այս հարցին ի պատասխան՝ Արտակ Մանուկյանը նշեց, որ չի կարող ո՛չ այո ասել, ո՛չ էլ՝ ոչ, և հավելեց, որ անձերի փոփոխությունը չէ խնդիրը, խնդիրը համակարգային է:
«Ներկա տնտեսական մոդելով շատ դժվար է լինելու ապագա կառավարությունների համար, ովքեր ստանձնելու են այս բեռը՝ հաշվի առնելով նաև այն, որ մեր պետական պարտքը բավականաչափ մեծ է:
Կոռուպցիայի դեմ պայքարելով՝ ստվերային գումարների թափանցիկ ձևով բյուջե մուտքագրումը Հայաստանի տնտեսության հետագա կայացման կամ գոյության լրջագույն, կարելի է ասել, միակ հնարավորությունն է: Որքան սա արագ կատարվի, այնքան արագ կկարողանանք որակական աճ գրանցել»,- ընդգծեց տնտեսագետը:
Անդրադառնալով Հովիկ Աբրահամյանի կառավարման արդյունավետության վերաբերյալ հարցին՝ նա նշեց, որ երկու տարի Հովիկ Աբրահամյանի կառավարությունը ձախողված է եղել: 2014թ-ի տնտեսական ցուցանիշները համեմատելով 2016-ի հետ՝ փորձագետը նշեց, որ Հայաստանի տնտեսությունը 4 տոկոս անկում է գրանցել, իսկ պետական պարտքն աճել է 14 տոկոսով, և անկում է ապրել նաև միջին աշխատավարձի ցուցանիշը:
Արտակ Մանուկյանի դիտարկմամբ՝ մոտալուտ ընտրությունների գործոնը մեծ նշանակություն ունի Հովիկ Աբրահամյանի հրաժարականի հարցում: Նրա խոսքով՝ հնարավորինս ավելի շատ ձայներ բերելու, փոփոխությունների իմիտացիա առաջացնելու համար ավելի դրական կերպար է հրամցվում հասարակությանը, կիրառվում են որոշակի մանիպուլյացիոն հնարքներ:
Մանրամասները՝ տեսանյութում:
