Կալիֆոռնիական SС Edison էներգետիկ ընկերությունը հինգշաբթի տեղի դատարան հայց է ներկայացրել ճապոնական Mitsubishi Heavy Industries կորպորացիայի և շոգեգեներատոր արտադրող նրա դուստր ընկերության դեմ: Այս մասին հայտնում է ITAR-TASS-ը:
SС Edison-ի տարածած հայտարարության մեջ ասվում է, որ ընկերությունը մտադիր է պատասխանատվության ենթարկել ճապոնական արտադրողին, որի շոգեգեներատորի անսարքության պատճառով փակվել է Կալիֆոռնիայի Սան Օնոֆրե ԱԷԿ-ը: Ընկերությունը հաստատում է, որ Mitsubishi-ն թույլ է տվել անփութություն և չի կարողացել շտկել սարքի տարրական անսարքությունը:
Ճապոնացի և ամերիկացի փաստաբանները 90 օր ունեն վեճը կարգավորելու համար: SС Edison-ի տվյալներով՝ հասցված վնասի չափը կարող է գերազանցել 2 միլիարդ դոլարը:
ԱԷԿ-ը էլեկտրականությամբ է ապահովել Կալիֆոռնիայի 1.4 մլն բնակելի տներ: