«Առաջին լրատվական»–ի զրուցակիցն է ԲՀԿ մամլո խոսնակ, պատգամավոր Տիգրան Ուրիխանյանը:
– Ինչո՞ւ է ԲՀԿ-ն վերջին շրջանում ավելի պասիվ: Նույնիսկ ԱԺ նստաշրջանի ավարտին համեմատաբար քիչ ակտիվություն դրսևորեց հատկապես Վերահսկիչ պալատի հաշվետվության կամ կառավարության հետ կապված քննարկումներում: Կարծիք կա, թե աշնանն է ակտիվանալու:
– ՎՊ զեկույցի մասին ասվել է ամեն ինչ, ընդ որում` մի քանի անգամ: Ես առիթ ունեցել եմ հենց այդ պահին դահլիճում ելույթ ունենալ, հորդորել, որ նյութերն ուղարկվեն դատախազություն: Զարմանք ու զայրույթ արտահայտել, թե ինչպես կարելի է առանց պատասխանատվության թողնել նրանց, ովքեր ժողովրդի նույնիսկ դեղին ու հացին չհերիքող փողերում են չարաշահումներ արել: ԲՀԿ այլ ներկայացուցիչներ նույնպես խոսել են այդ հարցի վերաբերյալ: Կառավարության գործունեության նկատմամբ էլ անընդմեջ է խոսվել:
– Բայց, այդ ամենով հանդերձ, վերջին շրջանում ԲՀԿ-ն պակաս ակտիվ է, և դա նկատելի է:
– Կուսակցության ղեկավարությունը շարունակում է իր ներքին կուսակցական համակարգող, կանոնակարգող գործունեությունը: Նույնը նաև՝ արտաքին հարաբերություններում, առանձին պատգամավորներ մեկնում են գործուղումների: Ամեն ինչ տեսանելի է և ներկայացվում է: Ներկառուցվածքային ռեֆորմներ, կուսակցական կազմակերպչական աշխատանքներ են իրականացվում: Հանրությանը հետաքրքրող յուրաքանչյուր հարցի շուրջ դիրքորոշում հայտնվել է: ԱԺ-ն արձակուրդում է, բայց խորհրդարանական խմբակցության 90 տոկոսը շարունակում է հաճախել խորհրդարան, կուսակցական գործունեությամբ զբաղվել: Դա նույնիսկ գերակտիվություն է:
– Աշունը սովորաբար կուսակցությունների համար վերբեռնման սեզոն է: Այդ առումով ԲՀԿ-ն ի՞նչ է ծրագրեր ունի: Արդյոք նոր նպատակներ կդնի՞, գործունեությունը կվերաարժևորի՞:
– Մենք քաղաքական գործունեություն, նպատակներ վերաարժևորելու խնդիր չունենք, որովհետև դրանք արժևորվել և ուրվագծվել են մեկընդմիշտ: Այլ բան է, որ կախված որոշակի ժամանակահատվածներից, օրինակ` աշնանը վերսկսվելու է ԱԺ հերթական նստաշրջանը, և համապատասխանաբար ակտիվանում է նաև աշխատանքը: Մենք ընթանում ենք նույն ճանապարհով: Ավելի՞ մեծ թափով՝ կախված իրավիճակից:
– Առաջիկա 4-5 տարիներին, երբ համապետական ընտրություններ չկան, ԲՀԿ-ն շարունակելու է ներքաղակական առօրյա գործունեությո՞ւնը, թե՞ կաշխատի այնպիսի տրամադրություններ հասունացնել, որոնք կարող են արտահերթ ընտրությունների կամ ներքաղաքական ցնցումների հանգեցնել:
– Ես կարող եմ պատասխանել իմ կարծիքի շրջանակներում, ես ընդամենը այս կուսակցության խոսնակը և 36 պատգամավորներից մեկն եմ: Իսկ այդ տրամաչափի հարցերը պետք է քննարկվեն կուսակցության քաղաքական խորհրդում, ղեկավարության շրջանակներում:
– Նման հարցեր չե՞ն քննարկվել:
– Վերացական հարցեր չեն քննարկվել, բազմաթիվ անելիքներ կան, և դրանք ժողովրդի կողմից մեզ տրված լիազորությունների, գործառույթների շրջանակներում են լինելու: Գումարած՝ առավելապես վերահսկողություն, պարտադրանք և առավելապես պահանջատիրություն:
– ՀԱԿ-ը հայտարարել է նախագահին իմպիչմենթի ենթարկելու նախաձեռնություն սկսելու մասին: ԲՀԿ-ն ՀԱԿ-ի հետ որոշակի համագործակցություն ունի, հնարավո՞ր է, որ միանաք այդ նախաձեռնությանը:
– Եթե ու երբ կուսակցությունը կայացնի որևէ որոշում և տրամադրի ինձ որևէ տեղեկատվություն, ես այդ մասին կտեղեկացնեմ: Ենթադրություններ չեմ ուզում անել:
– Հիմա, երբ ՀՀ-ն կանգնած է Եվրասիական միություն, թե Ասոցացման համաձայնագիր, ՌԴ, թե արևմուտք ընտրության առջև, արտաքին քաղաքական այդ կողմնորոշումների դեպքում ի՞նչ նախասիրություններ ունի ԲՀԿ-ն:
– Մենք հստակ դիրքորոշում ունենք՝ ՀՀ արտաքին հարաբերությունները որևէ պետության հետ կամ միջպետական ու միջազգային միավորման հետ չեն կարող լինել այլ պետության կամ այլ միավորման հետ հարաբերությունների հաշվին: ԵՄ հետ համագործակցությունը, այդ թվում` Ասոցացման համաձայնագրի շուրջ գործընթացը և Եվրասիական ինտեգրման գործընթացի քննարկումները, մասնավորապես Մաքսային միությանը միանալ-չմիանալու ուղղությունների միջև մենք հակադրություն չենք տեսնում: Ես՝ որպես պատվիրակ, ով բոլոր երկրներում ու ձևաչափերում առաջին օրվանից սկսած մասնակցում է եվրասիական ինտեգրման գործընթացի շուրջ քննարկումներին, ՀՀ-ԵՄ խորհրդարանական խմբում նաև որոշակի մի հարցով զեկուցել եմ Ասոցացման համաձայնագրի մասին, չեմ տեսել ոչ մի կոշտ պահանջատիրական դրսևորում: Մեկ կամ մյուս ուղղությունը ներկայացնող առանձին դեմքեր, ինչպես, օրինակ, Լեհաստանի նախագահը երբեմն իրենց թույլ են տալիս մի փոքր ավելի կոշտ և հստակ շրջանակների մեջ տեղավորվող ձևակերպումներ անել:
– ՀՀ-ում ՌԴ նախկին դեսպանն էլ կոշտ հայտարարություն արեց:
– Պաշտոնական դիրքորոշումներ ես չեմ լսել, նախկին դեսպանը նախկին դեսպանն է, և դրանով ամեն ինչ ասված է: Նախկինների խոսքերը պաշտոնական չեն:
– ԲՀԿ փոխնախագահ Վարդան Օսկանյանը գարնանը ցանկություն հայտնեց, որ ԲՀԿ-ն աշնանային նստաշրջանում ընդդիմադիր լինելու մասին հայտարարություն անի: Նման հարց քննարկվե՞լ է կուսակցությունում:
– Պարոն Օսկանյանի յուրաքանչյուր կարծիք, անշուշտ, արժանի է ուշադրության և համապատասխան կերպով դիտարկվում է կուսակցության քաղխորհրդի կողմից:
– Եվ ի՞նչ եզրահանգման եք եկել:
– Ձեզ հայտնի է ԲՀԿ դիրքորոշումը, այն բազմիցս ներկայացվել է: Կուսակցության ղեկավարությունը հայտարարություն է արել, որը կարծում եմ, որ մեկնաբանության անհրաժեշտություն չկա: Դրանից հետո քանի որ ոմանք կամ ամբողջությամբ չըմբռնեցին, կամ չվերծանեցին, տրվեց մանրամասն մեկնաբանություն:
– Ինչպե՞ս եք մեկնաբանում ՌԴ-ում ՀՀ քաղաքացի Հրաչյա Հարությունյանի հետ կապված դեպքի շուրջ ձևավորված տրամադրությունները թե մեր երկրում, թե ՌԴ-ում:
– Շատ եմ ցանկանում, որ բոլորը, այդ թվում` ՌԴ-ում վարույթ իրականացնող մարմինները, բժիշկները, որոնք այսօր հայ լրագրողների հարցերին ցինիկ պատասխան են տվել, հասկանան մի պարզ ճշմարտություն՝ տեղի է ունեցել ողբերգություն: Եվ ես ցավակցություն եմ հայտնում ոչ միայն զոհվածների ընտանիքներին ու տուժածներին, այլև մեր հայաստանցուն: Մարդը դժբախտության մեջ է ընկել և ոչ թե հանցագործություն է կատարել: Ոչ միայն տարրական մարդկային վերաբերմունքի, միջազգային նորմերի, էթիկայի շրջանակներում է հարկավոր նրա հանդեպ պատշաճ վերաբերմունք դրսևորել, այլ պետք է նաև այդ հանգամանքը հաշվի առնել:
– Ամեն դեպքում, Ձեր կարծիքով` ՌԴ կողմից միտումնավոր չէ՞ր նման ստորացուցիչ վերաբերմունքը հայ վարորդի նկատմամբ:
– Դուք կարծում եք, որ քննիչները կամ դատարան բերման ենթարկող ծառայողները Ռուսաստա՞նն են ներկայացնում:
– Նույն մարդիկ շատ լավ գիտեն, որ այդ տեսքով դատարան մարդ չեն տանի, և կարող էին ընդունել Հ. Հարությունյանի հարազատների առաջարկած հագուստը:
– Ես առաջարկում եմ, որ ծայրահեղությունների մեջ չընկնենք և օբյեկտիվ գնահատականներ հնչեցնենք:
– Այդ դեպքում ո՞ւմ դեմ էր ուղղված ՀՀ-ում սկսված այս դժգոհությունը: ՌԴ-ի՞, թե՞ ձեր ասած ծառայողների:
– Իմ դժգոհությունն ուղղված է բոլոր նրանց դեմ, ովքեր ցանկացած ազգության, ցանկացած պետության նկատմամբ կդրսևորեն անհարգալից վերաբերմունք: Առավել ևս՝ Հայաստանի Հանրապետության: Ո՞ւմ դեմ են դժգոհում ուրիշները կամ կա՞ այդտեղ շահարկում, արդեն այլ հարց է:
– Մեկնաբանություններ են հնչում, որ դա հայ-ռուսական հարաբերությունների սրացման արդյունք էր, և ոչ թե պարզ ողբերգական դեպքի նկատմամբ վերաբերմունք:
– Ես կարծում եմ, որ քննիչները կամ դատարանի աշխատողները ՌԴ-ն չեն ներկայացնում, առավել ևս քաղաքականություն և հարաբերություններ չեն վարում այլ պետությունների հետ: Եթե նրանք դրսևորել են անհարգալից վերաբերմունք, լկտիություն, ապա վստահ եմ, որ ՌԴ համապատասխան կառույցների ղեկավարությունը նրանց անպայման պատասխանատվության կարժանացնի:
– Վստա՞հ եք:
– Հույս ունեմ: