Անցել է մեկ շաբաթ, ինչ Ջերաբլուսում ջիհադիստական խմբավորումների աջակցությամբ «Եփրատի վահան» գործողությունն է սկսվել: Փորձագետների կարծիքով՝ Թուրքիան պետք է զգույշ գործի:
Թուրքիայի կառավարության արտահայտությունը, թե «Մենք կմնանք այստեղ այնքան, որքան պետք լինի», նշանակում է, որ Թուրքիան դեռ երկար կմնա Սիրիայում: Այդ գործողությունը մի քանի նպատակ ունի. առաջինը ԴԱԻՇ-ի ոչնչացումն է, երկրորդը՝ քրդերին Եփրատի արևելյան հատված քշելը, երրորդը՝ Ջերաբլուսից մինչև Ազազա անվտանգության վերահսկելի գոտի ստեղծելը՝ այդ նպատակով մի կողմից օգտագործելով փախստականներին, մյուս կողմից՝ Թուրքիայի և Սիրիայի միջև բուֆերային գոտի ստեղծելով:
ԱՄՆ-ը կանգնել է երկընտրանքի առջև
Իհարկե, ԱՄՆ-ը դժգոհ է քրդերի հետ Թուրքիայի հակամարտությունից, սակայն նա երկընտրանքի առջև է կանգնած, որովհետև նրան գոհացնում է այն, որ Թուրքիան պայքարում է ԴԱԻՇ-ի դեմ: Թուրքիայի դիրքերը ամրապնդում է նաև Իրանի և Ռուսաստանի դիրքորոշումը: Երկու պետություններն էլ հստակ հասկանալ տվեցին, որ կողմ են Սիրիայի տարածքային ամբողջականությանը: Ստացվում է՝ քանի որ փոխվել է Թուրքիայի դիրքորոշումը Ասադի նկատմամբ, ուրեմն Իրանը և Ռուսաստանը այնքան էլ հեռու չեն քրդերի նկատմամբ Թուրքիայի վերաբերմունքից:
Վտանգ միշտ էլ կա
Թուրք վերլուծաբաններից ոմանց կարծիքով՝ Թուրքիան ընկղմվում է ճահիճի մեջ: Որոշ վերլուծաբաններ էլ կարծում են, որ վտանգ, իհարկե, միշտ էլ կա, նման միջամտությունները միշտ էլ վտանգ են պարունակում, հատկապես քրդերի դեմ գործողությունները, սակայն Թուրքիայի դիրքերը, նրանց կարծիքով, այժմ ավելի ուժեղ են, քան նախկինում: Թուրքիան պետք է հնարավորինս զգույշ գործի. Ե՛վ, Ռուսաստանը, և՛ Իրանը, և՛ Դամասկոսը, և՛ ԱՄՆ-ը ուշադիր հետևում են Թուրքիայի գոևծողություններին. եթե Թուրքիան սխալ քայլեր կատարի, այդ գործողությունը կարող է թակարդի վերածվել: Ավելի վաղ Թուրքիան չէր ներխուժում Սիրիա. եթե այս փուլում հաշվի չառնվի ուժերի տարածաշրջանային հավասարակշռությունը, վերջնահաշվարկը Թուրքիայի համար կարող է ծանր լինել:
