Բելառուսական տրակտորներ արտադրող «Բոբրույսկի» գործարանը դատի է տվել Հայաստանի գյուղատնտեսության նախկին փոխնախարար, ԲՀԿ-ական Վարդան Կարապետյանին, քանի որ վերջինս այդպես էլ չվճարեց Հայաստան բերած բելառուսական տրակտորների դիմաց: Այս մասին «Առաջին լրատվական»-ի հետ զրույցում ասաց գործարանի լրատվության և հասարակայնության հետ կապերի պատասխանատու Վասիլի Վիլենինովիչը:
Նրա խոսքով` Վարդան Կարապետյանն այդպես էլ չվճարեց գումարն ամբողջությամբ, ինչի պատճառով գործարանը որոշել է նրան դատի տալ: Իսկ թե երբ կլինի առաջին դատական նիստը, Վ. Վիլենինովիչը դժվարացավ պատասխանել:
Հիշեցնենք, որ 2012 թվականի մայիսին ՀՀ կառավարության անդամ, գյուղատնտեսության փոխնախարար Վարդան Կարապետյանը ընկերությանն առաջարկել է «Բելառուս-311» մակնիշի 9 տրակտորներ մատակարարել իր` «Վ. Կարապետյան և ընկերներ» ընկերության համար` 84 հազար դոլար ընդհանուր արժողությամբ: Բելառուսական գործարանը, «Հայաստանի կառավարության անդամների հանդեպ մեծ վստահությունից ելնելով», մայիսին պայմանագիր է կնքել, և հունիսի 19-ին ապրանքը տեղափոխվել է Հայաստան` պայմանով, որ գումարը կարող է փոխանցվել 10 օր ուշացումով, սակայն մինչ այժմ բելառուսական գործարանը չի ստացել տրակտորների գումարն ամբողջությամբ:
