Իսպանիայում ձերբակալել են Բրայան Չերինգթոնին, ով ենթադրաբար ղեկավարել է միջազգային հանցավոր խմբավորում, որը զբաղվել է դեպի Եվրոպա թմրանյութերի մատակարարմամբ: Ինչպես գրում է The Times-ը, նա ամենափնտրվող բրիտանացի հանցագործներից մեկն է:
Չերինգթոնին ձերբակալել են Իսպանիայի հարավարևելյան Ալիկանտե մարզի Ալբիր գյուղում: Նրա հետ ձերբակալվել է նրա որդիներից մեկը: Անցկացված խոշոր միջազգային օպերացայի շրջանակում Իսպանիայում ձերբակալվել են ևս 5-ը: 6 մարդ էլ ձերբակալվել է Վենեսուելայում: Վերջիններիս թվում է Չերինգթոնի ընկերուհին, ով զբաղվել է կոկաինի հերթական մատակարարման կազմակերպմամբ:
Ալբիրի բնակարաններից մեկում, որը չի հստակեցվում՝ նրա՞ն է պատկանում, թե՞ ոչ, հայտնաբերվել է 220 կգ կոկաին, որը կարող էր վաճառվել մի քանի տասնյակ միլիոն դոլարով: Այս մասին հայտնում է France-Presse գործակալությունը: Կալանքի տակ են դրվել 5 մլն եվրոյի չափով հաշիվները:
Բացի այդ, ոստիկանությունը կալանք է դրել Իսպանիայում ունեցվածքի՝ Ալիկանտեում 10 շքեղ առանձնատների, ինչպես նաև անմիջապես Չերինգթոնին պատկանող 6 մոտորանավակների ու բազմաթիվ մեքենաների վրա:
Ոստիկանության տվյալներով՝ Չերինգթոնը կազմակերպել էր ծովով կոկաինի մատակարարումներ Վենեսուելայից Եվրոպա:
Նշենք, որ 57-ամյա Չերինգթոնը նախկինում բազմիցս է ձերբակալվել ու բանտարկվել: Նա սկսել է թմրանյութերի առևտրով զբաղվել 1980-ականների վերջերից:
