Այս տարի ավելի շատ երեխաներ սոցիալական պատճառներով դպրոց չեն հաճախի: Կրթական տեխնոլոգիաների ազգային կենտրոնի` ԿՏԱԿ-ի տվյալներով՝ այս տարի 302 երեխա դպրոց չի հաճախի և ուսումը կիսատ կթողնի: Այս երեխաներից 191-ը կրթությունից դուրս է մնացել՝ սոցիալական պայմաններից ելնելով: Անցյալ տարի ավելի քիչ թվով երեխաներ են կրթությունից դուրս մնացել` 250 երեխա, որից 143-ը սոցիալական պատճառներով:
Այսօր լրագրողների հետ հանդիպման ժամանակ ՀՀԿ-ական պատգամավոր Ռուզան Մուրադյանը անդրադառնալով այս փաստին՝ նշեց. «Եթե նման թվեր կան, իրոք մտահոգիչ է, ինձ էլ, որպես մանկավարժ, մտահոգում է»: Նա նշեց նաև, որ նախկինում կար հանրակրթությունից դուրս մնացած երեխաների հետ հատուկ աշխատանքային ընթացակարգ, որոնք բացահայտում էին պատճառները, նրանց հետ դպրոց վերադարձնելու աշխատանքներ էր տարվում: Նրա դիտարկմամբ՝ այսօր և՛ սոցիալական ծրագրերն են բավարար, և՛ շատ են այն մարդիկ, որոնք պատրաստ են օգնելու, պարզապես խնդիրն այն է, որ պետք է սրանք բոլորն ի մի բերել:
Երևանի ավագանում «Բարև Երևան» խմբակցության անդամ Անահիտ Բախշյանը նշեց, որ օրենքով, երեխաների` կրթության մեջ լինելու պարտականությունը վերապահված է տեղական ինքնակառավարման մարմիններին և առաջին հերթին դպրոցի տնօրենին: «Տնօրենը պետք է գնա, պարզի պատճառը, համայնքը պետք է շատ ուշադիր և հոգատար լինի այս հարցում»,- ընդգծեց Ա. Բախշյանը:
Մանրամասները` տեսանյութում
