ԱՄՆ Դեմոկրատական կուսակցության մի շարք անդամներ Քլինթոնների ընտանիքին կոչ են արել խզել կապերը Clinton Foundation հիմնադրամի հետ՝ նախագահական ընտրություններում իրենց կուսակցության թեկնածու Հիլարի Քլինթոնի հաղթանակի դեպքում։ Այս մասին հայտնում է The Wall Street Journal-ը։
Ինչպես հայտնի է՝ ԱՄՆ նախկին նախագահ Բիլ Քլինթոնը խոստացել է հեռանալ կազմակերպության տնօրենների խորհրդից կնոջ՝ ԱՄՆ նախագահ ընտրվելու դեպքում, ինչպես նաև հրաժարվել կորպորացիաների, օտարերկրյա ընկերությունների ու կառավարությունների նվիրատվություններից։
Սակայն Քլինթոնների կողմնակիցները կարծում են, որ այդ միջոցառումները բավարար չեն հիմնադրամի հովանավորների կողմից ազդեցության կանխման համար։
Արիզոնա նահանգից ԱՄՆ Ներկայացուցիչների պալատի անդամ Ռաուլ Գրիխալվայի խոսքով՝ հիմնադրամը դարձել է շեղող մանևր՝ քաղաքական տեսանկյունից։ «Եզրագծին մեծ մրցանակ է։ Մեծ մրցանակը հիմնադրամը չէ, այլ ԱՄՆ նախագահի պաշտոնը»,- ասել է նա։
Հիմնադրամի հովանավորներից մեկի՝ Ուիլյամ Գելսթոնի կարծիքով՝ առավել խելամիտ լուծում կլինի նախագահությունը սկսել Քլինթոնների ընտանիքի և հիմնադրամի միջև հստակ տարանջատմամբ։ Նա հավելել է, որ դա հեշտ լուծում չի լինի, սակայն կլինի լավագույնը՝ Քլինթոնի վարչակազմի և երկրի համար։
Ընտանիքին մոտ աղբյուրները հաստատում են, որ Քլինթոններին հեշտ չի լինի հիմնադրամից հրաժարվելը։ Նրանց որոշ դաշնակիցներ, օրինակ՝ Լոս Անջելեսում դեմոկրատների առաջնորդ Էրիկ Բաումանը հնարավոր է համարում այն տարբերակը, որի դեպքում Քլինթոնների դուստր Չելսին կմնա կազմակերպությունում։
