ԵՊՀ Իրանագիտության ամբիոնի վարիչ, իրանագետ Վարդան Ոսկանյանը «Առաջին լրատվական»-ին տված հարցազրույցում անդրադարձավ Իրանի տարածաշրջանային քաղաքականությանը, արևմտյան պատժամիջոցներից վերացումից և միջազգային մեկուսացումից դուրս գալուց հետո մեր տարածաշրջանի երկրների՝ Հայաստանի, Վրաստանի, Ադրբեջանի, ինչպես նաև Ռուսաստանի հետ Իրանի հարաբերությունների զարգացման դինամիկային, հատկապես` հայ-իրանական հարաբերություններին և Իրան-Ադրբեջան-Ռուսաստան համագործակցության առանցքի ձևավորման վերջին միտումներին, դրա հեռանկարներին և հնարավոր վտանգներին Հայաստանի համար:
Այս համատեքստում իրանագետը խոսեց նաև Ղարաբաղյան հակամարտության մասին:
«Իրանական քաղաքականությունը Հարավային Կովկասի վերաբերյալ կրում է ժամանակային որոշակի զարգացումներ, փոփոխություններ, բայց կա մի կարևոր շեշտադրում. Իրանի չի մասնակցում Հայաստանի մեկուսացմանն ուղղված ծրագրերին: Հայաստանի հետ հարաբերությունները ամենաբարձր մակարդակի վրա պահելու, Հարավային Կովկասում Հայաստանին որպես դաշնակից երկիր դիտարկելու առանցքի շուրջ է կառուցվում Իրանի քաղաքականությունը: Այս ամենը չի նշանակում, որ Իրանը մյուս երկրների հետ իր հարաբերությունները կառուցելու է՝ հաշվի առնելով առաջին հերթին հաշվի առնելով հայկական շահերը. իրանցիներն առաջին հերթին սեփական շահերով են առաջնորդվում, և դա բնական է»,- նշեց իրանագետը:
Վարդան Ոսկանյանի կարծիքով՝ Հայաստանը պետք իրականացնի իր օրակարգը. «Եթե Հյուսիս-Հարավ մայրուղի ենք կառուցում, եթե տրանսպորտային ծրագրեր իրականացնենք և ակտիվորեն աշխատենք չինական կողմի հետ և կարողանանք կապիտալ ձեռք բերել և կառուցել Իրան-Հայաստան երկաթուղին, այս դեպքում, ուզելով թե չուզելով, հաշվի կնստեն մեզ հետ»:
«Ակնհայտ է, որ քառօրյա հաղթական պատերազմը ցույց տվեց, որ հայկական կողմը տարածաշրջանում ոչ թե օբյեկտ է, այլ սուբյեկտ. հայ զինվորն է պատասխան տալիս, թե այս բլուրը մերն է լինելու, թե չի լինելու»,- ընդգծեց Վարդան Ոսկանյանը՝ հավելելով, որ համամիտ չէ մեր հասարակությանը պարտադրվող այն տրամադրությունների հետ, թե մենք թույլ երկիր ենք, փակուղային վիճակում ենք: Նրա խոսքով՝ Հայաստանի Հանրապետությունն ու Լեռնային Ղարաբաղն այս տարածաշրջանում ունեն հսկայական ներուժ:
Մանրամասները՝ տեսանյութում:
