Սեպտեմբերի 1-ին Հարավային Կալիֆորնիայի համալսարանի հայագիտության ինստիտուտը Կինոարվեստի դպրոցի հետ համատեղ Լոս Անջելեսում կկազմակերպի ռեժիսոր Էրիկ Նազարյանի և սցենարիստ Նարե Մկրտչյանի «Տան մյուս կողմը» ֆիլմը՝ Հայոց ցեղասպանության վերաբերյալ:
Ինստիտուտի ղեկավար Սալփի Ղազարյանի խոսքով` ցեղասպանությունից հետո փրկված հայերից շատերը, ովքեր մնացել էին Թուրքիայում, ձեռք են բերել նոր ինքնություն երբեմն իրենց կամքով, իսկ հաճախ` ոչ:
«Նրանք թաքնված հայեր էին, գիտեին` ովքեր են իրենք, սակայն երբ ցեղասպանության սերունդը անհետացավ, երրորդ կամ չորրորդ սերունդները, ովքեր աստիճանաբար բացահայտեցին իրենց արմատները, ցնցվում էին և պատրաստ չէին երրորդ ինքնության: Այս ֆիլմը այդ դժվար անցումային շրջանի մասին է»,- ասել է ինստիտուտի ղեկավարը:
«Տան մյուս կողմը» փաստագրական ֆիլմը պատմություն է հայ ռեժիսորի և թուրք կնոջ՝ Ցեղասպանության 100-րդ տարելիցի նախաշեմին դեպի Հայաստան և Թուրքիա ճամփորդության մասին: Նարե Մկրտչյանի թրքուհի հերոսուհին, որը համարձակություն է ունեցել Ցեղասպանության 100-ամյակի տարելիցին նախորդած օրերին գնալ Երևան, իր ողջ կյանքն ապրել է որպես թրքուհի, մինչ այն պահը, երբ իմացել է, որ իր տատը հայուհի է: Նա թաքցրել է իր ինքնությունը, բայց նրա ներսում միշտ կռվել են Ցեղասպանություն վերապրածն ու Ցեղասպանությունը ժխտողը: Նա խոր ապրումներով և հակասական հույզերով բարձրանում է Ծիծեռնակաբերդ: Հայկական արմատներով թրքուհուն հետևում է հայ ռեժիսորը, ով ծնվել է Ցեղասպանությունից հետո՝ Ցեղասպանությունը վերապրածների գերդաստանում:
Էրիկ Նազարյանը ծնվել է Հայաստանում, սակայն մեծացել Լոս Անջելեսում: Նա համալսարանի Կինոարվեստի դպրոցի շրջանավարտ է: Դասախոսություններ է կարդացել Հայոց ցեղասպանության վերաբերյալ Եվրոպայի և ԱՄՆ համալսարաններում: Ռեժիսոր Նարե Մկրտչյանը նույնպես բնակվում է Լոս Անջելեսում և Կինոարվեստի դպրոցի շրջանավարտ է: Նրա տարերքն է պատմել մարդկային եզակի պատմություններ, որոնք կապում են մարդկանց իրար`չճանաչելով ազգային, կրոնական և այլ սահմաններ:
