iPad-ը և դրանով խաղալը, պարզվում է, ոչ պակաս արդյունավետ են երեխաների ուշադրությունը շեղելու և նրանց վիրաբուժական վիրահատությունների ժամանակ անզգայացումից առաջ հանգստացնելու համար, քան ներկայումս կիրառվող հանգստաբեր դեղամիջոցները: RIA Novosti-ի հաղորդմամբ՝ այս մասին Հոնկոնգում Անեսթեզիոլոգների համաշխարհային կոնգրեսի նիստում հայտարարել են վիրաբույժները:
«Մեր հետազոտությունը ցույց տվեց, որ երեխան հանգստանում է և դադարում իրեն միայնակ զգալ ծնողներից և՛ միդազոլամ ընդունելիս, և՛ iPad օգտագործելիս: Մյուս կողմից՝ անզգայացումն ավելի արագ և «որակով» է վրա հասել, և ծնողներն ավելի գոհ են եղել, երբ մենք iPad-ներ ենք օգտագործել: Այսպիսով կարելի է ասել, որ iPad-ների և այլ պլանշետների օգտագործումը կարող է օգնել հիվանդ-երեխաներին պայքարել նախավիրահատական սթրեսի դեմ»,- հայտարարել է Դոմինիկ Շասարը Լիոնի համալսարանից (Ֆրանսիա):
Վիրաբույժները այս եզրակացությանն են հանգել Լիոնի համալսարանի կլինիկայում փորձի ընթացքում, որի շրջանակներում ընտրելով ավելի քան 100 կամավոր ծնողների և երեխաների զույգեր՝ գիտնականները նրանց բաժանել են երկու խմբի. մեկում երեխաներին հանգստացրել են հանգստաբեր միդազոլամի հաբերով, մյուսում փորձել են նրանց ուշադրությունը շեղել iPad-ի միջոցով:
Պարզվել է՝ էլեկտրոնային սարքը դեղամիջոցից ոչ վատ հանգստաբեր ազդեցություն է ունեցել երեխայի վրա:
