Ադրբեջանական APA լրատվական գործակալության փոխանցմամբ՝ Ադրբեջանը չի բացառում իր տարածքով Եվրոպա TANAP գազատարով իրանական ու իրաքյան գազի տարանցման հնարավորությունը: Այս մասին Էներգետիկայի էկոնոմիկայի միջազգային ասոցիացիայի (IAEE) Եվրասիական առաջին համաժողովի ժամանակ հայտարարել է Ադրբեջանի էներգետիկայի փոխնախարար Նատիգ Աբասովը:
«Ադրբեջանը TANAP գազատարի նախաձեռնողներից մեկն է: Ներկայումս Ադրբեջանը դիտարկում է իր տարածքով Եվրոպա՝ TANAP-ին միանալով, իրանական գազի տարանցման հնարավորությունը:
Իրանի ու Ադրբեջանի միջև կա համապատասխան ենթակառուցվածք, որի օգնությամբ կարելի է Իրանից և անգամ Իրաքից Ադրբեջանի տարածքով TANAP գազատարով գազը տարանցել դեպի Եվրոպա:
Իրաքի ու Իրանի միջև նույնպես կա ենթակառուցվածք, որի օգնությամբ կարելի է իրաքյան գազը հասցնել Իրան՝ հետագայում այն Ադրբեջանի տարածքով, TANAP գազատարով Եվրոպա հասցնելու համար»,- ասել է փոխնախարարը:
