Հարավային Կորեայի իշխող «Սենուրիդան» կուսակցությունից 23 օրենսդիրներ կոչ են արել դիտարկել երկրում ատոմային սուզանավեր տեղակայելու հնարավորությունը՝ Հյուսիսային Կորեային դիմակայելու համար: Այս մասին հայտնում է «Ռենհափ» գործակալությունը:
Անցած շաբաթ Հյուսիսային Կորեան իրականացրել է սուզանավի բալիստիկ հրթիռի բարեհաջող փորձնական արձակում, որն անցել է 500 կմ և ընկել Ճապոնիայի ՀՕՊ գոտում:
«Կորեայի Հանրապետության զինված ուժերը հյուսիսկորեական սուզանավի բալիստիկ հրթիռների սպառնալիքին պետք է արդյունավետ կերպով դիմակայեն ատոմային սուզանավերի միջոցով, որոնք կկարողանան հայտնաբերել և գրոհել Հյուսիսային Կորեայի նավերը»,- ասվում է «Սենուրիդանի» օրենսդիրների հայտարարության մեջ:
Ներկայում Հարավային Կորեայի ռազմածովային ուժերն ունեն 17 սուզանավ: Հարավկորեական բանակում միջուկային սուզանավ չկա:
