«Հոկտեմբերի 27-ից հետո, Մարտի 1-ի դեպքերից հետո, ժողովուրդն ավելի զսպված, ավելի զգուշավոր է դարձել: Զարմանալին այն է, որ բողոքի ալիքը, դժգոհության պոռթկումները այլ ձևաչափով են արտահայտում՝ այստեղից հեռանալով. Կարծեք թե դա պայքարի ձև է: հուսալքված, հուսախաբված՝ թունելի վերջում լույս չտեսնելով՝ հեռանում են: Եթե ասեն, որ այսօր հեռացողների մի մասը վերադանում են, ես չեմ հավատա»,- այս մասին «Առաջին լրատվական»- ի հետ զրույցում ասաց հոգեբան Ռուբեն Պողոսյանը:
«Վերջին շրջանի պոռթկումը մի քիչ այլ բան էր, իրադրային, լոկալ երևույթ էր. Քառօրյա պատերազմից հետո Արցախի ճակատագրի հետ կապված՝ նորանոր լուծումների մասին իշխանությունները լռում են՝ չուզենալով նոր, տհաճ տրամադրություններ արթնացնել… «Սասնա ծռեր» խումբը կարծես թե սթափեցրեց՝ թմբիրից արթնացնելու համար: Սոցիալական մի շերտ կար, որ գնաց այդ խմբի հետևից, բայց դա չի նշանակում, որ միայն այդ շերտն է դժգոհ, ժողովրդի մոտ 80 տոկոսը դժգոհ է, սոցիալական անարդարությունից ազգովի դժգոհություն է»,- նշեց հոգեբանը:
Նրա դիտարկմամբ՝ իշխանությունները դասեր չեն քաղում այս ամենից, որ իրենք էլ վերափոխվեն. «Իշխանությունն ինքը պետք է ժողովրդավարություն սովորի: Իշխանությունը, ժողովրդավարություն ասելով, հասկանում է ժողովրդին վարել, ցանել. անգամ այդ հասկացությունն իր տեղում չէ արդեն 20-25 տարի: Ի՞նչ անկախության մասին կարելի է խոսել, երբ մարդն օտարված է իր երկրում: Այս երկիրը կարծես թե իր երկիրը չէ,- ընդգծեց Ռ. Պողոսյանը՝ հավելելով, որ իշխանությունները արհամարհական կեցվացք ունեն ժողովրդի հանդեպ, սա ժողովուրդը հանդուրժել չի կարողանում:
Հոգեբանը նաև հավելեց, որ իշխանությունը տնտեսագիտական առումով տգիտություն ցուցաբերեց և սա հանգեցերեց նրան, որ տնտեսությունը մենաշնորհային դարձավ, և դա էլ բերեց քաղաքական անկման:
Մանրամասները՝ տեսանյութում:
