Իսրայելի զինվորականներն օգտագործել են թուրքական ռազմական բազա՝ Սիրիայի տարածքին հարվածներ հասցնելու համար, որի հետևանքով, ԶԼՄ-ների տվյալներով՝ ոչնչացվել է ռուսական հականավային հրթիռներով պահեստ: Այս մասին հաղորդում է Russia Today հեռուստաալիքը՝ վկայակոչելով իրավիճակին ծանոթ իր աղբյուրին:
Ընդհուպ մինչև 2013թ. մարտը Թուրքիայի և Իսրայելի միջև հարաբերությունները ձևավորվել են ոչ լավագույն կերպով, ինչի պատճառը հիմնականում երեք տարվա վաղեմության դեպքն է, երբ թուրք ութ ակտիվիստներ սպանվեցին Իսրայելի հարձակման հետևանքով: Այդ ժամանակ Թուրքիան խզեց դիվանագիտական և ռազմական կապերն Իսրայելի հետ՝ ի նշան բողոքի:
Գերտերությունները պայմանավորվեցին բարելավել հարաբերությունները միայն այն բանից հետո, երբ Իսրայելի վարչապետ Բենիամին Նեթանյահուն անձամբ ներողություն խնդրեց Թուրքիայի վարչապետ Ռեջեփ Թայիփ Էրդողանից՝ հաղորդում է RT-ը:
Եթե տվյալները հաստատվեն, թե՝ մուսուլմանական երկիրն օգնել է Իսրայելին հարձակում գործել մեկ այլ մուսուլմանական պետության վրա, Թուրքիան կարող է հայտնվել շատ բարդ իրադրության առջև:
Ավելի վաղ հաղորդվել էր, որ ոչնչացվել է Սիրիայի Լաթաքիա քաղաքի ռազմական օբյեկտը, որտեղ պահվել են «Յախոնտ» հրթիռները: Ամերիկյան ԶԼՄ-ները, վկայակոչելով երկրի կառավարության աղբյուրներին, հաղորդել են, որ պայթյունները կազմակերպվել են Իսրայելի ղեկավարության կողմից, իսկ հարձակման թիրախը եղել են հականավային ռուսական հրթիռները:
