Անկարան «անվտանգության գոտիներ» է ստեղծում փախստականների համար Սիրիայի Ջարաբլուս քաղաքի շրջանում, որը չորեքշաբթի թուրքական զորքերի աջակցությամբ անցել է Սիրիայի զինված ընդդիմության վերահսկողության տակ: Այս մասին CNN-ին տված հարցազրույցում ասել է Թուրքիայի նախագահի պաշտոնական ներկայացուցիչ Իբրահիմ Քալընը:
««Եփրատի վահան» գործողության գլխավոր նպատակը մեր սահմանը ԴԱԻՇ-ի բոլոր գրոհայիններից և այլ ահաբեկչական տարրերից մաքրելն է»,- նշել է նա:
«Վերջին երկու տարիներին մենք հանդես էինք գալիս Սիրիայի և Թուրքիայի միջև սահմանի շրջանում «անվտանգության գոտիներ» ստեղծելու օգտին մի շարք պատճառներով, նախ՝ մեր սահմանը պաշտպանելու համար, բայց նաև Սիրիայից փախստականներին ապաստան տրամադրելու համար»,- ասել է Քալընը: «Հետագայում այդ գոտիների վերահսկողությունը կփոխանցվի սիրիացի ժողովրդին,- վստահեցրել է նա:- Հենց դա է ներկայումս տեղի ունենում Ջարաբլուսում»:
Թուրքական բանակը չորեքշաբթի կոալիցիայի ավիացիայի և սիրիական ընդդիմության աջակցությամբ սկսել է ԴԱԻՇ-ի գրոհայիններից սիրիական Ջարաբլուս քաղաքի ազատագրման գործողությունը: Սիրիայի իշխանությունները Թուրքիայի գործողություններն անվանել են ինքնիշխանության խախտում: Մեկ օրում Ջարաբլուսն անցել է ընդդիմադիր Սիրիական ազատ բանակի վերահսկողության տակ:
