Պռոշյան գյուղում շարունակվում են համայնքի ղեկավարի ընտրությունները: Այս պահին, ինչպես «Առաջին լրատվական»-ին տեղեկացնում են 26/01 և 26/02 ընտրատեղամասերի նախագահները, արտակարգ միջադեպեր չեն գրանցվել, իսկ ընտրողների մասնակցությունը կարելի է գնահատել նորմալ:
Ընտրատեղամասերից մեկում «Առաջին լրատվական»-ը զրուցեց Պռոշյան գյուղի բնակչուհի Մայրանուշ Ստեփանյանի հետ: Անդրադառնալով տեղեկություններին, թե գյուղում նախկին գյուղապետ Հրաչ Մուրադյանի սպանությունից հետո լարված իրավիճակ է՝ նա ասաց, որ, ինքը լարվածություն չի նկատել: Գյուղն ապրել է իր բնականոն կյանքով: Ըստ գյուղի բնակչուհու՝ «եթե ՀՅԴ-ն այդ գյուղում ուժեղ է, թող հաղթի ՀՅԴ-ն, և թող հաղթի ուժեղ թեկնածուն»: Նրա կարծիքով՝ հենց այդպես էլ լինելու է, և ինքը քվեարկելու է ուժեղ թեկնածուի օգտին:
Այս պահին Պռոշյան գյուղի հրապարակը լի է ոստիկանական մեքենաներով: Հիշեցնենք, որ հենց այդ հատվածում էլ սպանվեց Պռոշյանի գյուղապետ Հրաչյա Մուրադյանը:
Նշենք, որ Պռոշյանի գյուղապետի պաշտոնի համար պայքարում են երեք ինքնառաջադրված թեկնածուներ՝ Պռոշյան համայնքի ղեկավարի տեղակալ, ՀՅԴ անդամ Վովա Սահակյանը, ՀՀԿ անդամ Արթուր Մուրադյանը և անկուսակցական, «ՀՀ նախագծերի պետական արտագերատեսչական փորձաքննություն» ՓԲԸ–ի գլխավոր մասնագետ Ալեքսան Ալեքսանյանը:
Հիշեցնենք, որ Պռոշյանի նախկին գյուղապետ Հրաչ Մուրադյանն ապրիլի 2-ին գյուղապետարանի դիմաց սպանվել է հրազենից:
