Սննդի մեջ միջատների օգտագործումը վաղուց վիճելի հարց է դարձել: Միացյալ ազգերի կազմակերպությունը վաղուց հրապարակել է «Ուտելու համար պիտանի միջատներ. մթերային անվտանգության և անասնապահության հեռանկարներ» գիրքը: Դրանում պատմվում է այն մասին, որ միջատները կարող են օգնել կերակրել մեր անընդհատ ավելացող բնակչությանը, որը, ինչպես նախատեսվում է, կհասնի 9 միլիարդի մինչև 2050 թ.: Միջատներն արդեն հանդիսանում են գրեթե 2 մլրդ մարդու ամենօրյա ճաշատեսակ:
Մինչև հիմա հրապարակվել էր ուտելու համար պիտանի 1900 միջատների տեսակներ, իսկ հիմա այդ թիվը գնալով աճում է: Միջատների օգտագործումը վնաս չի հասցնում բնությանը, նույնիսկ առողջարար է մարդու համար: Հետազոտողները նշում են, որ միջատները շատ սննդարար են, քանի որ պարունակում են մեծ քանակությամբ ճարպեր, սպիտակուցներ, վիտամիններ և հանքային նյութեր:
ՄԱԿ-ը մտադիր է փոխել մոլորակի բնակչության վերաբերմունքը միջատների նկատմամբ, որպեսզի դրանք ընկալվեն որպես սննդի աղբյուր:
