Համացանցում մեծ աղմուկ է բարձրացրել երգչուհի Արմինկայի` Հայաստանից հեռանալ ցանկանալու փաստը: Երգչուհին հարցազրույցներից մեկի ժամանակ նշել է, թե հնարավոր է `մի օր էլ ինքը ցանկանա հեռանալ Հայաստանից, քանի որ իր որդու ապագան այստեղ նա չի տեսնում:
Երգչուհին նաև նշել էր, որ Հայաստանում սկսել են գերիշխել ոչ մեղեդային երգերը` մեջբերելով, որ ցավոք, իր որդին այսօր հաճախ «Gangman style» է երգում:
Այս խոսքերը փաստորեն շատ մարդկանց «սրտեր են խոցել»: Ֆեյսբուքի օգտատերերը ակտիվ քննարկումներ են սկսել` մի կողմից վատաբանելով երգչուհուն, մյուս կողմից արդարացելով նրան:«Արմինկայի հեռացումով մեր երգարվեստը կազատվի վատ երգչուհուց», «Արմինկայի արտագաղթելուց օգուտից բացի վնաս չկա»` մեկը մյուսի հետևից հայտնվում էին մեկնաբանությունները: Ի հայտ եկան նաև մարդիկ, ովքեր հակառակ կարծիքի էին` «Եթե Արմինկան երկրից գնա, որ մեկիդ կյանքը կլավանա»:
Ստեղծված քաոսային իրադրությունում ArmStar.am-ը փորձել է ճշտել երգչուհու կարծիքն ու ստանալ մեկնաբանություն այս ամենի վերաբերյալ. «Ես ոչ մի բանի չեմ հետևում: Ես խնդրում եմ ինձ հանգիստ թողեք, ես առհասարակ չեմ հետևում ոչ մի լրատվական աղավաղումների: Եթե ինձ հետաքրքիր լիներ, թե իմ մասին ինչ են գրում, ես կմտնեի ու կկարդայի», – կարճ ու կոնկրետ պատասխանել է երգչուհի Արմինկան:
Խոսակցությունից պարզ է դարձել, որ երգչուհին իսկապես վրդովված և հիասթափված է, բայց թե ինչից կամ ումից, հստակ պարզ չէ:
Երգչուհին արտահայտվել է նաև համացանցում: Ֆեյսբուքյան իր էջում Արմինկան գրել է. «Հայտնի ի լուր աշխարհի ուզում եմ ասել, որ բոլորովին էլ չեմ պատրաստվում հեռանալ երկրից: Եթե հեռանալու լինեի, հավատացեք դա կանեի լուռ ու մունջ, ինչպես որ ապրում եմ լուռ ու զուսպ…իսկ տզրուկները թող շարունակեն իրար արյուն խմել համացանցում և իմանան, որ իմ արյունից ոչ մի կաթիլ իրանց բաժին չի հասնում!!!!!!!!»:
