«Սասնա ծռերի հետ կապված իրադարձությունների ժամանակ մենք տեսանք, որ մեր հասարակությունը հավատում է բացառապես խաղաղ պայքարի ձևերին, որովհետև այն ժամանակ, երբ խաղաղ պայքարի կոչեր էին հնչում, հանրությունը շատ ավելի ակտիվ էր»,- «Առաջին լրատվական»-ի հետ զրույցում ասաց «Քաղաքացիական պայմանագիր» կուսակցության վարչության նախագահ Արայիկ Հարությունյանը։
Նրա խոսքով՝ խաղաղ պայքարի ձևերից են նաև ընտրական գործընթացները, և «Սասնա ծռեր»-ից հետո պետք է վերադառնալ այն պնդմանը, որ փոփոխությունները բացառապես պետք է լինեն խաղաղ ճանապարհով։ «Մենք միայն այդպես ենք պատկերացնում փոփոխությունները։ Իշխանափոխության հիմնական մեխանիզմներից մեկը հենց ընտրական գործընթացներն են։ Իշխանափոխություն պետք է կատարվի ընտրական մեխանիզմով։ Քաղաքական ուժը պետք է ընտրական տեղամասում համոզվի, որ ինքը մանդատ է ստացել իշխանափոխություն կատարելու համար, անկախ նրանից՝ ԿԸՀ-ն կֆիքսի՞ այդ թվերը, թե՞ ոչ։ Մենք ՏԻՄ ընտրությունները այս համատեքստում ենք դիտարկում»,- հավելեց Հարությունյանը։
Մեր զրուցակիցն ընդգծեց, որ հենց ՏԻՄ ընտրություններով են փորձելու կատարելագործել իշխանափոխության իրենց մեխանիզմները, որպեսզի ավելի լավ պատրաստվեն խորհրդարանական ընտրություններին։ «Այս ընտրությունները կարևոր են նաև մեր տեղական կառույցները ամրապնդելու համար։ Ընդդիմությունը պետք է կարևորություն չտա միայն համապետական ընտրություններին։ Պետք է կարևորել նաև ՏԻՄ ընտրությունները, ամրապնդել մարզային կառույցները։ Իմ համոզմամբ՝ եթե, պայմանականորեն վերցրած, հեռավոր Հեռվաշեն համայնքում դու չունես ավագանու անդամ, նշանակում է՝ դու չունես թիմ այդ համայնքում և ի վիճակի չես համապետական ընտրությունների ժամանակ քարոզչություն իրականացնել այնտեղ, վերահսկողություն սահմանել և հաղթել»,- ընդգծեց ՔՊ վարչության նախագահը։
