Աջափնյակ և Դավթաշեն վարչական շրջանների ընդհանուր իրավասության դատարանում Վարդան Աբրահամյանի նախագահությամբ շարունակվեց էքստրասենս Անի Մաջնունյանի սպանության գործի դատական քննությունը:
Ավազակությամբ զուգորդված դիտավորյալ սպանության համար՝ ՀՀ քրեական օրենսգրքի 104 հոդվածի 2-րդ մասի 8-րդ կետով մեղադրվում է Մուշեղ Մխիթարյանը:
«Վեցերորդ զգայարան» հեռուստաշոուից հայտնի էքստրասենս Անի Մաջնունյանը սպանվել էր իր բնակարանում՝ դանակի բազմաթիվ՝ մոտ 50, այդ թվում՝ պարանոցին հասցված հարվածներով: Նրա դիակը հայտնաբերվել է 2015 թվականի օգոստոսի 5-ին: Նախորդ օրը՝ օգոստոսի 4-ին, ժամը 23-ի սահմաններում Անի Մաջնունյանին, ըստ գործի տվյալների, այցելել է սպանության համար մեղադրվող Մուշեղ Մխիթարյանը՝ «Յանուս» թատրոնի երիտասարդ ղեկավարը:
Վկաներից մեկին՝ Արամին, ում ընկերական միջավայրում «Մաքս» են ասում, գործով անցնող կարևոր վկա Աննան դեպքից հետո Անգլիական այգում հանդիպել ու պատմել էր, որ ընկերոջ հետ գնացել էր էքստրասենս Անի Մաջնունյանի տուն ու այնտեղ տեսել է էքստրասենսի արյունաքամվող մարմինը: Այսինքն, խոսակցություն էր գնացել, որ Աննան տեղեկություն ունի կատարված սպանության մասին:
Վկա Արամը նշել է, որ Աննայի հետ վերոհիշյալ խոսակցության ժամանակ իրենց կողքին էր նաև իրենց ծանոթ Գևորգ Մ.-ն, ով այս գործով նույնպես վկա է ու համառորեն դատարան չի ներկայանում:
Նրա վերաբերյալ կայացվել էր բերման ենթարկելու որոշում: Գևորգի բնակության վայրը, պարզվում է, անհայտ է: Պաշտպանական կողմը հուշել էր, որ Գևորգ Մ.-ին հնարավոր է գտնել Երևանի Անգլիական այգում՝ այնտեղի մշտական այցելուներից է:
Ոստիկանությունը հանձնարարություն էր ստացել վկա Գևորգ Մ.-ին բերման ենթարկել… հենց թեկուզ Անգլիական այգուց:
Սակայն դատարանում հրապարակվեց ոստիկանության տեղեկանքը, համաձայն որի՝ ոստիկաններն այցելել էին Անգլիական այգի, հարցում էին կատարել այգում գտնվող քաղաքացիներին, ու նրանց մեջ «Գևորգ Մ.» տվյալներով անձ չէր հայտնաբերվել…
Թվում էր՝ դատարանը բոլոր միջոցները ձեռնարկել էր արդեն այս վկային գտնելու և դատարանում հարցաքննելու համար:
Մեղադրող դատախազ Կ. Սավթալյանը նույնիսկ միջնորդեց հրապարակել վկայի նախաքննական ցուցմունքները:
Սակայն ամբաստանյալի շահերի պաշտպան, հանրային պաշտպանի գրասենյակի փաստաբան Մարինե Ֆարմանյանը դատարանին զարմացրեց նոր հայտարարությամբ:
Փաստաբանը հետաքրքրվել ու պարզել էր, որ այս գործով պաշտպանական կողմի համար մեծ հետաքրքրություն ներկայացնող վկա Գևորգ Մ.-ն ոչ թե Անգլիական կամ որևէ այլ մայրաքաղաքային այգում է, այլ գտնվում է… քննչական մեկուսարանում՝ «Նուբարաշենում»: Պաշտպանը նույնիսկ խցի համարը նշեց:
Նախագահողն ընդմիջեց նիստը՝ տեղեկությունը ստուգելու համար:
Ընդմիջումից հետո նախագահողը հայտարարեց, որ փաստաբանի հայտնած տեղեկությունը ստույգ է, նշված վկան մեկ այլ գործով անազատության մեջ է, գտնվում է «Նուբարաշենում»:
Դատական նիստը հետաձգվեց, որպեսզի դատարանը գրավոր դիմի Կենտրոն և Նորք-Մարաշ վարչական շրջանների ընդհանուր իրավասության դատարանի համապատասխան դատավորին՝ Գևորգ Մ.-ին այս գործով Աջափնյակի դատարան ներկայացնելու և հարցաքննելու թույլտվության հարցով:
Որպես սպանված էքստրասենս Անի Մաջնունյանի իրավահաջորդ՝ դատարանում արդեն հանդես է գալիս Անիի տարեց մայրը, ով հենակով դժվարությամբ է տեղաշարժվում:
Տուժողի իրավահաջորդի ներկայացուցիչը հանրային պաշտպանի գրասենյակի փաստաբան Թամարա Բաղդասարյանն է:
Դատական այս նիստին ամբաստանյալ Մուշեղ Մխիթարյանը բավական գունատ էր ու այնքան անտրամադիր, որ համարյա իր իսկական տարիքին էր երևում: Դաստակը վիրակապված էր: Տեսքը՝ անփույթ: Նա ոչ մի հայտարարություն չարեց, միայն ցրված հայացքով նայում էր դահլիճին:
