ԱԺ ՀԱԿ խմբակցության պատգամավոր Լյուդմիլա Սարգսյանը առաջիկայում կայանալիք ՏԻՄ ընտրությունները համարում է փորձաշրջան՝ հասկանալու համար, թե 2017 թվականի ընտրություններին ինչպես կբաշխվեն ձայները:
«Կարծում եմ, որ և Վանաձորում, և Գյումրիում անցկացվող ընտրությունները կներկայացնեն պատկերը, թե որ քաղաքական ուժերը ինչ հնարավորություններ կունենան 2017 թվականին»,- «Առաջին լրատվական»-ի հետ զրույցում ասաց Լյուդմիլա Սարգսյանը: Նա հավելեց, որ իրենց կուսակցությունը՝ ՎՍԴՀԿ-ն, մի քանի մարզերում կմասնակցի ընտրություններին, բայց ոչ առանձին: Իսկ թե կոնկրետ որ քաղաքական ուժի հետ են իրենք պատրաստվում մասնակցել՝ պատգամավորը չմանրամասնեց, «քանի որ վերջնական համաձայնության չենք եկել տեղերի բաշխման հարցում»:
Ինչ վերաբերում է ընտրական գործընթացների նկատմամբ ժողովրդի անվստահությանը՝ ՀԱԿ պատգամավորը արձագանքեց. «Իսկ ե՞րբ է եղել նման վստահություն. անկախությունից ի վեր ժողովրդի վստահությունը ընտրական գործընթացների նկատմամբ բացակայում է, ընդ որում՝ հիմնավոր է այդ անվստահությունը»: Այնուամենայնիվ, մեր զրուցակիցը լավատես է, որ այս նոր Ընտրական օրենսգիրքն ու կառավարման նոր համակարգը որոշակի զսպման մեխանիզմներ կապահովեն:
Դիտարկմանը՝ իշխանությունները, սակայն, կամք չեն դրսևորում իրականացնելու այն պայմանավորվածությունները, որ ձեռք էին բերվել նոր Ընտրական օրենսգրքի շուրջ, Լյուդմիլա Սարգսյանը հակադարձեց. «Որոշակի զսպման մեխանիզմներ արդեն կարծես կան: Իսկ այդ զսպման մեխանիզմների ներդրման գումարների ձեռք բերումը ես կհամարեմ տապալված միայն այն դեպքում, երբ ԱԺ-ում սկսվեն նիստերը, և մենք հասկանանք՝ իրականում ներդրվելո՞ւ են այդ գումարները, թե՞ ոչ»:
Ինչ վերաբերում է «Սասնա ծռերի» գործողությունների նկատմամբ քաղաքական ուժերի պասիվությանը, ապա մեր զրուցակիցը կարևորեց այն հանգամանքը, թե քաղաքական ուժերը որքանով էին ճիշտ համարում այդ գործողությունները. «Ըստ այդմ էլ նրանք փորձեցին ինչ-որ չափով ներքաշվել դրանց կամ ձեռնպահ մնալ: Իմ կարծիքով՝ մենք կարող ենք իշխանափոխության հասնել էվոլյուցիոն պրոցեսի արդյունքում կամ աշխարհաքաղաքական լրջագույն զարգացումների դեպքում»:
Մեր զրուցակցի կարծիքով՝ թեև Հայաստանի վրա ռուսական ճնշումները շատ մեծ են, սակայն նա Պուտինի հետ Սերժ Սարգսյանի վերջին հանդիպումից այնպիսի տպավորություն է ստացել, որ ՀՀ նախագահը «փորձում է բարձրացնել երկրի դիմադրողականությունը»:
