Իսպանացի Դավիթ Ռիոսը Diageo Reserve World Class միջազգային մրցույթում ճանաչվել է 2013թ. լավագույն բարմեն՝ հաղորդում է Euromag-ը:
Այս ոլորտի աշխատողների համար վերոնշյալ մրցույթը նույնքան հեղինակավոր է, որքան կինոարդյունաբերության գործիչների շրջանում Օսկարի մրցանակաբաշխությունը: Մրցույթին հաղթելու համար պայքարել են 50 մասնակից՝ աշխարհի 44 երկրներից:
Մի քանի ամիս շարունակ մրցակիցները, որոնք ներկայացրել են աշխարհի ամենահայտնի բարերը, մրցել են Diageo Reserve World Class մրցույթի եզրափակչի ուղեգիր ստանալու համար, որը կայացել է AzamaraJourney լյուքս դասի նավի վրա:
Եզրափակչի մասնակիցները Միջերկրական ծովում ճամփորդելու են դուրս եկել հուլիսի 4-ին, իսկ հինգ օր անց նավը կայանել է Բարսելոնի նավահանգստում, որտեղ կայացել է հաղթողին պարգևատրելու արարողությունը:
Առաջին մրցանակը ստացած Դավիթ Ռիոսը հայտարարել է, որ շատ հուզված և զարմացած է: Նա անհամբերությամբ սպասում է հաջորդ տարվան, երբ կմեկնի համաշխարհային շրջագայության, որի ընթացքում կհանդիպի բարմենների հետ, կսովորեցնի նորեկներին և կփնտրի նոր տաղանդներ:
