Համազգային հայ կրթական և մշակութային միության ուսանողական Ֆորումը Համազգայինի ավանդական ծրագրերից է։ Այն աշխարհի տարբեր երկրներում ուսանող հայ համալսարանականներին համախմբելու, ազգային արմատներին ու մշակութային ժառանգությանը հաղորդակից դարձնելու, ազգային հանձնառություններ ներարկելու ձեռնարկ է։
Այս տարի «Համազգայինի» ուսանողական ֆորումը տեղի է ունենալու հուլիսի 13-ից 29-ը։ Ֆորումին իրենց մասնակցությունն են բերելու Սփյուռքի տասը գաղթօջախներ ( ԱՄՆ, Լիբանան, Սիրիա, Անգլիա, Ֆրանսիա, Ավստրալիա, Կանադա, ԱՄԷ, Թուրքիա, Վրաստան, Կիպրոս) ներկայացնող շուրջ 40 հայ երիտասարդներ, ինչպես նաև մասնակիցներ Հայաստանից և Արցախից։
Ծրագրի 17 օրերի ընթացքում համալսարանական երիտասարդներն առիթ կունենան հանդիպելու հայրենի մտավորականների, քաղաքական-հասարակական գործիչների հետ, կլսեն պատմամշակութային թեմաներով դասախոսություններ, իրենց հայաստանցի հասակակիցների հետ կքննարկեն ժամանակակից հայ երիտասարդներին հուզող տարաբնույթ խնդիրներ։
Համահավաքի օրերին Սփյուռքահայ ուսանողները կհյուրընկալվեն Երևանի պետական համալսարանում, Հայաստանի Ամերիկյան Համալսարանում, Մայր Աթոռ Սուրբ Էջմիածնում, կլսեն դասախոսություններ «Ով է հայը, ինքնության խնդիրներ», «Հայոց գրերը, մշակույթն ու պատմությունը», «Հայկական մշակութային ժառանգության պահպանում», «Ազգային նվագարաններ», «Հայ դատը այսօր» և այլ թեմաներով։
Ֆորումը քառօրյա ծրագրով կայցելի նաև Արցախ, կհյուրընկալվի Ազգային ժողովում, կլինի Ազգային բանակի զորամասում։ Ֆորումի բացումը տեղի կունենա հուլիս 13-ին, ժամը 12:00-ին ԵՊՀ հյուրատանը Մաշտոց 52 հասցեում:
