«Պայքարն անընդհատ գործընթաց է, ժողովուրդների պատմության մեջ անընդհատ պայքարի տարբեր փուլեր են լինում, և ժողովուրդներն ու պետությունները հասնում են իրենց առջև դրված նպատակներին: Մենք այս պահին նպատակ ունենք մեր պետությունը պահպանելու, չկորցնելու մեր պետականությունը, մեր տարածքները, մեր սահմանների ամբողջականությունը»,- «Առաջին լրատվական»- ի հետ զրույցում այս մասին ասաց Արմենակ Կյուրեղյանը:
Անդրադառնալով դիտարկմանը, որ այս պահին նրանք, ովքեր համակարգում էին հանրահավաքները, այսօր ձերբակալված են, Ա. Կյուրեղյանը նշեց, որ պետք է ամեն ինչ անել՝ և՛ իրավաբանական, և՛ բարոյական, և՛ քաղաքական աջակցություն ցուցաբերել բոլորին:
Ցանցային պայքարի վերաբերյալ Ա. Կյուրեղյանը նշեց, որ մեր հասարակությունը պետք է հասկանա, որ հարցը առաջնորդներով չի լուծվում, ժողովրդով է լուծվում, առաջնորդներն ուղղակի դառնում են առաջամարտիկները: Նրա դիտարկմամբ՝ շարժումը պետք է իր կառուցվածքային մարմինները ստեղծի, որպեսզի ղեկավարելի լինի, ավելի ճկուն կառավարվի, տեսակետների բախման արդյունքում լուծումներ ի հատ գան:
Անդրադառնալով պաշտոնանկություններին՝ Ա. Կյուրեղյանը նշեց. «Ոչ մեկին չես խաբի նման կոսմետիկ գործողություններով, ոնց որ ժողովրդի աչքի առաջ «մատնոց ֆռցնեն», ժողովուրդը համակարգային փոփոխությունների է սպասում, որ դատական, օրենսդիր և գործադիր իշխանությունները տարանջատված լինեն և հակակշիռներ ունենան, որպեսզի չենթարկվեն մեկ կենտրոնի, որը բերում է այնպիսի պետության, ինչպիսին մենք ունենք»:
Ա. Կուրեղյանի կարծիքով՝ «Սասնա ծռեր»-ի գործողություններից հետո փոխվել է հասարակության վերաբերմունքը, ամեն մարդ իր մեջ է ինչ-որ չափով պատասխանատվություն զգում իր երկրի ճակատագրի համար: «Բացի դրանից՝ մեր ժողովուրդն ունի «հաց բերող», որը ոչ մի ժողովուրդ չունի. դա հույս է ներշնչում»:
Մանրամասները՝ տեսանյութում:
