Օրերս պաշտոնից ազատվեցին և պահեստազոր ուղարկվեցին պաշտպանության նախարարության 10 գնդապետներ:
ՀՀ պաշտպանության նախարարության մամուլի խոսնակ Արծրուն Հովհաննիսյանը այս առնչությամբ հնչած տարատեսակ մեկնաբանություններին (մասնավորապես՝ իրավապաշտպան Արթուր Սաքունցի կարծիքով՝ դրա պատճառն այն էր, որ ԼՂ հարցով բանակցությունների վերաբերյալ անհամաձայնություն կար ՊՆ-ի և այդ մարդկանց միջև) ի պատասխան՝ ասաց. «Պարոն Սաքունցի մեկնաբանությունն անհեթեթություն է: ՊՆ կադրային քաղաքականությունը շատ հստակ է՝ շատերն իրենց փառահեղ անցյալից հետո գնում են թոշակի: Կա նաև սերնդափոխության խնդիր»:
Նրա խոսքով՝ կոնկրետ տվյալ գնդապետները ուղարկվել են զինվորական թոշակի իրենց ժամանակը լրանալու պատճառով:
«Պաշտպանության համակարգում տեղի ունեցող իրավիճակները, փոփոխությունները, բարեփոխումները շատ դեպքերում իրենց պատկերացրած օրինաչափություններին և ինտրիգներին չեն ենթարկվում: Դա իրենց ֆանտազիան է»,- նշեց Արծրուն Հովհաննիսյանը:
Մեր զրուցակցի խոսքով՝ պարզապես քաղաքականությունը օրեցօր փոխվում է, զինված ուժերի ներքին կյանքի լուսաբանման թափանցիկությունը օրեցօր բարձրանում է, և «դրանում սկսում են այլ վատ բաներ փնտրել ու գտնել»: