Այսօր Aravot.am-ի հետ զրույցում Գորիսի՝ 1992-94 թվականների քաղաքապետ, տարածաշրջանի ինքնապաշտպանության կոմիտեի համանախագահ Սամվել Հարությունյանը կայքի միջոցով Զանգեզուրի պղնձամոլիբդենային կոմբինատի տնօրեն Մաքսիմ Հակոբյանին բաց նամակ է ուղղել, որը բացահայտում է Սուրեն Խաչատրյանի հետ նրա գործարքների մասին:
Ստորև ներկայացնում ենք նամակը.
«Հարգելի պարոն Մ. Հակոբյան, հանրահայտ է, որ Քաջարանի պղնձամոլիբդենային կոմբինատը Սյունիքի մարզի առաջնահերթ կարիքները հոգալու նպատակով վերջին տարիներին «Սյունիք» բարեգործական հիմնադրամին (նախագահ՝ նախկին մարզպետ Սուրեն Խաչատրյան) փոխանցել է ծանրակշիռ ֆինանսական միջոցներ: Անշուշտ, ժողովուրդն իրավունք ունի տեղեկանալու, թե Դուք ինչքան դրամ եք փոխանցել նշված հիմնադրամին և արդյոք համապատասխան հսկողություն իրականացվե՞լ է այդ ֆինանսական միջոցների ծախսերի հետ կապված: Հայտնի է նաև, որ Ձեր կոմբինատը ամիսներ առաջ գնել է մոլիբդենով և պղնձով հարուստ Գեղիի հանքի շահագործման իրավունքը: Հրապարակվել է, որ ՀՀ կառավարության որոշմամբ Խաչատրյանն է ձեռք բերել այդ հանքի շահագործման իրավունքը: Խնդրում եմ հրապարակել, թե Ձեր կոմբինատը ՀՀ Սահմանադրությամբ ազգային հարստություն հանդիսացող այդ հանքի շահագործման իրավունքը երբ, ումից և ինչքան գումարով է գնել:
ՀՀ քաղաքացի Սամվել Հարությունյան»
