«Ոսկե ծիրան» միջազգային 10-րդ փառատոնի շրջանակներում Հայաստանում են գտնվում Ֆրանսիական կինոկենտրոնի տնօրեն Էրիկ Գարանդոն, Ստամբուլում Ֆրանսիայի Գլխավոր հյուպատոսության աուդիովիզուալ կցորդ Ֆաննի Օբեր-Մալորին, Ardèche Images միջազգային ծրագրերի ղեկավար Ժան-Մարի Բարբը:
Այսօր Ֆրանսիայի դեսպանատանը տեղի ունեցած մամլո ասուլիսի ժամանակ Ֆրանսիայի դեսպան Անրի Ռենոն, խոսելով «Ոսկե ծիրան» միջազգային փառատոնի մասին, նշեց, որ այս տարի կինոփառատոնի պատվո հյուրն է Շառլ Ազնավուրը, իսկ փառատոնի բացումը արժևորվեց Ֆրանսուա Տրուֆոյի «Կրակել դաշնակահարին» ֆիլմով, ավելին՝ «Ոսկե ծիրանի» փակումը նույնպես կնշանավորվի ֆրանսիական ֆիլմով, կցուցադրվի Սերժ Ավետիքյանի և Օլենա Ֆետիսովայի «Փարաջանով» ֆիլմը:
Դեսպանը նշեց, որ փառատոնի շրջանակում համատեղ արտադրության շուրջ քսան ֆիլմ է ներկայացված, որոնց դեսպանատունն իր աջակցությունն է կարողացել ցուցաբերել: Համագործակցության այս մոդելին, ըստ դեսպանի, կարելի է նախանձել:
Էրիկ Գարանդոն հանդիպել է կինոկենտրոնի ղեկավար Գևորգ Գևորգյանցի հետ, համատեղ ծրագրեր են քննարկել: «Հայերի կինոարվեստի ջիղին մենք հավատում ենք, և մեր խմբերում հայկական արմատներով աշխատակիցները շատ են»,- ասաց Էրիկ Գարանդոն:
Դեսպանը նշեց, որ այսօր հանդիպման երկրորդ պատճառը Եվրասիայի վավերագրական ֆիլմերի ծրագրի իրականացումն է, որի նախաձեռնողը հենց Ֆրանսիան է: Այն ֆինանսավորվում է Եվրամիության կողմից և կազմակերպվում «Ոսկե ծիրան» միջազգային փառատոնի հետ համատեղ: Եվրասիայի վավերագրական ֆիլմերի համաժողովը Երևանում կտևի մինչև հուլիսի 15-ը: Այս ծրագիրը միավորում է ավելի քանի հիսուն ռեժիսորների, պրոդյուսերների և եվրոպական ու եվրասիական մասնագետների միջև կապեր, ինչպես նաև հեղինակային վավերագրական ֆիլմերի մասնագետների միջազգային ցանց ստեղծելու նպատակ ունի: Քառասուն երկրների հետ համատեղ այս տաիներին 130 արտադրանք են ստեղծել Eurasiadoc վավերագրական ֆիլմերի շրջանակում:
Ժան Մարի Բարբը նշեց, որ երիտասարդ սցենարիստների և ռեժիսորների հետ համատեղ թեմաների առումով որևէ սահմանափակումներ չկան: «Կարևորը բովանդակությունն է և ձևը, որով այն արտահայտվում է, լրագրությունը ընդամենը կենտորնացած է և հիմնված փաստերի վրա, բայց այդուհանդերձ, պետք է լրագրողը սյուժե զարգացնի: Մեզ հետ աշխատող երիտասարդ արվեստագետներին հանդիպման հենց առաջին պահից մի բան ենք ասում՝ միշտ ձևն են կարևորում՝ որպես բառի գեղագիտական իմաստ, որովհետև ձևով է պայմանավորված աշխարհընկալումը, կարևոր է ձևը, որ պետք է միահյուսված լինի սյուժեի և այն մթնոլորտի հետ, որի մեջ զարգանում է սյուժեն, և շեշտը դրվում է ոչ թե արգելված թեմաների կամ տաբուների վրա, այլ թե ինչպես են կինոյի լեզվով վերարտադրում ներկայացնում այս կամ այն հարցը»,- ասաց նա:
Այս տարի ծրագրում երկու հայ կան ներգրավված՝ Մովսես Գասպարյանը և Աշոտ Մկրտչյանը, նախորդ տարի երեքն էին: Նա հույս հայտնեց, որ մյուս տարի նրանց թիվը չորսի կհասնի:
Հայաստանում նախատեսվում է երիտասարդ սցենարիստների հերթական աշխատանք Գյումրիում, որի մասին սեպտեմբերին կհայտարարեն:
Այս տարվա քսաներեք մասնակիցներից տասնութն իգական սեռի ներկայացուցիչներ են։ Եթե նախորդ տարի գերակշռում էին տղամարդիկ, այս տարի սցենարիստների ցանկում գերակշռում են կանայք: «Այստեղից կարող ենք ենթադրել որ կինը նաև կինոյի ապագան է»,– ասաց Ժան Մարի Բարբը:
Նա նշեց, որ Գյումրիի կինոարվեստի ինստիտուտի մագիստրատուրայում նպատակ ունեն ստեղծել վավերագրողների բաժին, ինչի ստեղծման համար առնվազն երկու տարի է անհրաժեշտ:
Դեսպան Ժան Ռենոն նշեց, որ հայ–ֆրանսիական համագործակցության կենտրոնական տեղերից մեկն էլ զբաղեցնում է կինեմատոգրաֆը:
Լուսանկարը՝ PanARMENIAN Photo-ի
