Սյունիքի նորանշանակ մարզպետ Վահե Հակոբյանը սպասում էր մարզպետի պաշտոնի առաջարկ ստանալուն: Այս մասին նա հայտարարեց կառավարության այսօրվա նիստից հետո` լրագրողների հետ ճեպազրույցում: «Գիտեք, որ մաժորիտար համակարգով եմ պատգամավոր՝ երեք անգամ. սկզբում՝ Գորիսից, հետո նաև՝ Կապանից: Փորձելու ենք մարզի հիմնախնդիրները հասցնել կառավարությանը»,- ասաց Վ. Հակոբյանը:
Նախկին մարզպետ Սուրեն Խաչատրյանը հարցազրույցներից մեկում ասել էր, թե ինքն է առաջարկել որպես իրեն փոխարինող նշանակել Վահե Հակոբյանին: Մեկնաբանելով այդ հայտարարությունը` Վ. Հակոբյանն ասաց, թե կարծում է, որ նման հարցազրույց չի եղել, և որ իրեն նախագահ Սերժ Սարգսյանն է առաջարկել: «Լինելու եմ հրապարակային, բաց, իրականացնելու եմ նաև կառավարության ծրագրերը»,- հայտարարեց նա:
Վ. Հակոբյանի հայրը` Զանգեզուրի պղնձամոլիբդենային կոմբինատի սեփականատեր Մաքսիմ Հակոբյանը, իր հարցազրույցներից մեկում ասել էր, թե իր որդին ավելի բարձր պաշտոնների կհասնի: Լրագրողներց մեկը հետաքրքրվեց՝ արդյոք Վահե Հակոբյանը ցանկանո՞ւմ է դառնալ նախագահ: «Իմ հայրը արդյունաբերության լավագույն հրամանատարներից մեկն է, ցանկացած ծնողի համար որդու հաջողությունները շատ կարևոր են»,- ասաց Վ. Հակոբյանը: Հիմա ուզո՞ւմ եք նախագահ դառնալ՝ ճշտող հարցից հետո էլ վերջինս բացասաբար չպատասխանեց:
