Կառավարության այսօրվա նիստում բացասական եզրակացություն է տալու Ազգային Ժողովի պատգամավորներ Հեղինե Բիշարյանի և Հովհաննես Մարգարյանի՝ օրենսդրական նախաձեռնության կարգով ներկայացրած «Հայխնայբանկում ավանդատու հանդիսացող Արցախյան պատերազմի մասնակիցներին` ազատամարտիկներին, որպես նախկին ԽՍՀՄ Խնայբանկի ՀԽՍՀ հանրապետական բանկում մինչև 1993 թվականի հունիսի 10-ը ներդրված դրամական ավանդների դիմաց փոխհատուցում տրամադրելու մասին» օրենքի նախագծին: Նախագծի ընդունումամբ, ըստ ՕԵԿ-ական պատգամավորների, հնարավորություն կստեղծվեր ավանդատու հանդիսացող Արցախյան պատերազմի մասնակիցներին` ազատամարտիկներին առաջնահերթության կարգով ստանալու ավանդների փոխհատուցումը:
Կառավարությունը գտնում է, որ գործող օրենսդրությամբ արդեն իսկ կարգավորում են նախագծով առաջարկվող կատեգորիայի անձանց փոխհատուցում տալու հետ կապված հարաբերությունները: Բացի այդ, ըստ կառավարության, նախագծում օրենսդրական տեխնիկայի կանոնները մասամբ պահպանված չեն:
