Գերմանիայի մայրաքաղաք Բեռլինում հատուկ ջոկատայինները գրոհել են 24-ամյա ուսանողի բնակարանը և առգրավել այնտեղ գտնվող Ադոլֆ Հիտլերի դիմանկարը՝ 2.8 մ բարձրությամբ և 1.9 մ լայնությամբ: Այս մասին հաղորդում է Berliner Morgenpost-ը:
Ոստիկանները ներխուժել են ուսանողի բնակարան և հրամայել պառկել հատակին՝ չնայած այն բանին, որ նա դիմադրություն ցույց չի տվել: Այնուհետև նրանք խուզարկել են տարածքը, սակայն գտել են միայն խաղալիք ատրճանակ և այդ դիմանկարը: Նկարում Հիտլերը պատկերված է շագանակագույն համազգեստով:
Ոստիկանությունում մեկնաբանել են, որ հաղորդագրություն են ստացել, թե փողոցից երևում է Հիտլերի դիմանկարը, ինչպես նաև ենթադրել են, որ ուսանողի մոտ հնարավոր է զենք լինի:
Չի հաղորդվում՝ արդյոք նրա հանդեպ քրեական գործ հարուցվե՞լ է, թե՞ ոչ:
Ուսանողին բարկացրել է առգրավումը, և նա հայտարարել է, որ մտադիր է դիմանկարը հետ ստանալ իրավաբանների օգնությամբ: Նա լրագրողներին ասել է, որ ինքն է նկարել կտավը և չի նախատեսել վաճառել այն: Այսպիսով նա ցանկացել է իր բողոքն արտահայտել ազգայնական խորհրդանիշների արգելքի դեմ և ցույց տալ, թե ինչ է արվեստի ազատությունը:
Գերմանիայում ազգայնական խորհրդանիշի կիրառումը համարվում է հանցագործություն: