Հայաստանում և Թուրքիայիում ԶՄԼ-ների և քաղաքացիական հասարակության շրջաններում անցկացվել են հարցումներ ու ուսումնասիրություններ` երկու երկրների հարաբերությունների նորմալացմանն ուղղված հանրության կարծիքը իմանալու համար:
Այսօր «Կոնգրես» հյուրանոցում սկսվեց «Հայ-թուրքական հարաբերությունները և ԶԼՄ-ների դերը» ուսումնասիրության մինչ այժմ գրանցած արդյունքների ամփոփման եռօրյա ծրագիրը:
2010թ. հոկտեմբերից սկսված այս ծրագիրը նախաձեռնել է Եվրասիա համագործակցության հիմնադրամը` Հայաստանում և Թուրքիայում գործող երկու կազմակերպությունների հետ համատեղ: Հայաստանում ծրագրի իրականացմանն աջակցել է Երևանի մամուլի ակումբը, իսկ Թուրքիայում` Ստամբուլի Մշակույթի համալսարանը:
Ողջունելով կողմերի պատրաստակամությունը մասնակցել ծրագրին` Եվրասիա կենտրոնի ներկայացուցիչը, ծրագրի համակարգող Սվեն Բեհրենդը ասաց. «Երկու պետությունների համար էլ ռիսկ է թույլ տալ, որ երրորդ կողմ համարվող միջազգային կազմակերպություն նման ուսումնասիրություն անցկացնի, սակայն դրան գնալը միանշանակ արդարացված է, քանի որ կողմերի հասարակությունների միջև հավելյալ քննարկումները միայն դրական են և կխթանեն հարաբերությունների հաստատման գործընթացը»:
Հարաբերությունների կարգավորման համար կարևոր է նաև, որպեսզի Հայաստանը ստորագրի ՄԱԿ-ի կոնվենցիան` դեպի ծով ելք չունեցող երկրների համար, ինչը Հայաստանը դեռ չի արել:
Ըստ Սվեն Բեհրենդի` երկու երկրներում էլ անհրաժեշտություն կա մայրաքաղաքներից դուրս հասարակության իրազեկման մակարդակը բարձրացնելու, ինչպես նաև երկխոսության մասնակիցների թիվը մեծացնելու համար: «Շատ պասիվ են հարաբերությունները հատկապես մշակութային ասպարեզում, օրինակ` կա լուրջ կարիք ազգագրական աշխատանքի: Կարևոր է նաև տնտեսական համագործակցության ավելացումը»,- նշում է Բեհրենդը:
Վաղվա սեմինարին կքննարկվի լրատվամիջոցների դերը` հայ-թուրքական հարաբերությունների կարգավորման հարցում: