Օրեր առաջ զանգվածային անկարգություններ կազմակերպելու մեղադրանքով ձերբակալվեցին և կալանավորվեցին Երևանի ավագանու «Բարև Երևան» խմբակցության երկու անդամները՝ Արմեն Մարտիրոսյանն ու Դավիթ Սանասարյանը: «Առաջին լրատվական»- ի հետ զրույցում «Բարև Երևան» խմբակցության ղեկավար Գագիկ Բաղդասարյանը նշեց, որ Ա. Մարտիրոսյանը և Դ. Սանասարյանը հանրահավաքների ընթացքում ամեն կերպ փորձում էին թույլ չտալ բռնության կոչեր և բռնարարքներ, փորձում էին զսպել և կանխել հասարակության և ոստիկանության միջև բախումը:
Խմբակցությունը դատապարտում է այս իրողությունը՝ հիմք ընդունելով փաստաբանների հայտարարությունն առ այն, որ նրանց կալանավորումը շինծու է, քաղաքական հետապնդում է իրականացվում: Խմբակցությունը անընդունելի է համարում անտարբերությունը մայրաքաղաքում ծավալված վերջին իրադարձությունների հանդեպ՝ կոչ անելով միանալ «Բարև Երևան» խմբակցության պահանջին՝ անհապաղ ազատ արձակել Երևանի ավագանու անդամներ Արմեն Մարտիրոսյանին և Դավիթ Սանասարյանին: Խմբակցությունը նաև քաղաքապետ Տարոն Մարգարյանի աջակցությունն է ակնկալում, Գ. Բաղդասարյանի հավաստմամբ՝ քաղաքապետի կողմից դեռևս արձագանք չկա:
Գ. Բաղդասարյանը, որպես ականատես, նշեց, որ բախումներ հրահրող սադրիչները ոստիկանական շարքերից դուրս էին գալիս, հրահրում էին քարեր նետել, ժողովրդին կոչ էին անում հարձակվել ոստիկանների վրա, այդ կոչին ենթարկվողներին սկսում էին բռնության ենթարկել, մինչդեռ սադրիչները մոտենում էին ոստիկանական շարքին, այն բացվում էր և նրանք ներս էին գնում: «Առաջին իսկ օրվանից մենք հարց բարձրացրինք և իրավապահ մարմինների առջև խնդիր դրեցինք բացահայտել, թե ովքեր են այդ բախման իրական մեղավորները»:
Գագիկ Բաղդասարյանը մտահոգություն հայտնեց խաղաղ ցույցերի ժամանակ ոստիկանության կողմից ցուցարարների նկատմամբ բռնություն կիրառելու կապակցությամբ. «Բնակչությունն ահաբեկված է այս վիճակից, ահաբեկված են այն երեխաները, որոնց տուն են ներխուժել ոստիկանները և որոնց աչքի առաջ բերման էին ենթարկում, ծեծի էին ենթարկում ծնողին, դա երբեք չի մոռանա ահաբեկված երեխան: Խաղաղ ցուցարարները, որոնք պայքարում են իրենց իրավունքների, արդար հայրենիք ստեղծելու գաղափարի համար, նրանք բռնությունների են ենթարկվում»:
Գ. Բաղդասարյանը նշեց նաև, որ թեև դեմ է զինված ապստամբությանը, սակայն «Սասնա ծռեր»- ի քայլը, որին գնացել են հանուն գաղափարի՝ հույս ունենալով, որ իրենց արարքի արդյունքում ինչ-որ բան կփոխվի, հերոսական է, իսկ ոստիկանների պահվածքն այդ օրերին դավաճանական էր:
Մանրամասները՝ տեսանյութում:
