Ազգային ժողովի նախագահ Հովիկ Աբրահամյանը շաբաթ-կիրակի օրերին Լեռնային Ղարաբաղում էր և Արցախի ղեկավարների հետ խոսում էր այդ երկրի տնտեսական զարգացումներից ու ներդրումներից: ԱԺ նախագահը Ղարաբաղ էր մեկնել մի շարք պատգամավորների՝ Սամվել Ալեքսանյանի, Ալեքսան Պետրոսյանի, Մուրադ Մուրադյանի, նույնիսկ գյուղատնտեսության փոխնախարար Սամվել Գալստյանի ուղեկցությամբ: Քննարկման հիմնական թեման հատկապես գյուղատնտեսական ոլորտում Արցախի ունեցած ներուժն ու զարգացման և ներդրումային հնարավորություններն են եղել:
Թվում է, թե այստեղ որևէ արտառոց բան չկա՝ Հայաստանի բարձրաստիճան պաշտոնյան մեկնել է հայկական երկրորդ հանրապետություն, հանդիպել այդ երկրի նախագահին, վարչապետին ու փոխվարչապետին և քննարկել տնտեսական զարգացումներին առնչվող հարցեր: Սակայն խնդիրն այն է, որ Արցախ է մեկնել ու տնտեսական զարգացումների մասին մտքեր հայտնել ոչ թե Հայաստանի գործադիր իշխանության բարձրաստիճան պաշտոնյա, այլ ԱԺ նախագահը: Նա Արցախ է մեկնել ոչ թե այդ երկրի ԱԺ նախագահի հետ քննարկելու երկու երկրների խորհրդարանական համագործակցության, այլ տնտեսական, անգամ գյուղատնտեսական և Արցախի ու Հայաստանի մարզերի ու շրջանների միջև համագործակցությանն առնչվող հարցեր:
Այնպիսի տպավորություն է, որ Հ. Աբրահամյանը վերջին շաբաթների փորձություններից, հնարավոր հրաժարականից, իր նկատմամբ ձևավորված ներիշխանական և ներկուսակցական անվստահությունից հետո անգամ չի կարողանում հրաժարվել վարչապետի պաշտոնն ստանալու մտքից: Հոգ չէ, որ անցած շաբաթ Ուկրաինա կատարած նրա այցը չստացվեց, փոխարենը ԱԺ նախագահն իր համար այց կազմակերպեց դեպի Արցախ: Ավելին՝ այդ այցի համար կարծես թե հրավերք էլ չի եղել: Համենայնդեպս, այդպիսի որևէ հրապարակում չի եղել: ԼՂՀ նախագահի կայքում այցի հետ կապված հաղորդագրության մեջ ընդամենը նշված է, որ ԼՂՀ նախագահ Բակո Սահակյանը Հ. Աբրահամյանի գլխավորած պատվիրակությանը դիմավորել է, և նրանք ծանոթացել են Արցախի հարավային թևում իրականացվող մի շարք ծրագրերի ընթացքին:
Կարծիքներ են շրջանառվում, որ Հ. Աբրահամյանն Արցախ է մեկնել ոչ միայն, այսպես ասած, միջպետական այցի շրջանակներում, այլև ԱԺ նախագահը, ինչպես ՀՀ շատ պաշտոնյաներ, այնտեղ նաև բիզնես-հետաքրքրություններ ունի: Արցախը ունի հարուստ բնություն և գյուղատնտեսությունը զարգացնելու մեծ պոտենցիալ: Գյուղատնտեսության ոլորտում մեծ բիզնեսներ ունեցող ՀՀ ԱԺ նախագահի աչքից այդ հնարավորությունը չէր կարող վրիպել:
