Բոլիվիայի մայրաքաղաք Լա Պասում հարյուրավոր ցուցարարներ ԱՄՆ-ի դեսպանատան մոտ մասնակցել են երթի, որն ավարտվել է ԱՄՆ-ի և եվրոպական մի շարք երկրների դրոշներն այրելով՝ հաղորդում է RIA Novosti-ն:
Ցուցարարները նախագահ Էվո Մորալեսի կողմնակիցներն էին: Մորալեսի ինքնաթիռին անցած շաբաթ թույլ չէին տվել թռիչքներ իրականացնել եվրոպական մի շարք պետությունների օդային տարածքով՝ կասկածելով, որ այդ ինքնաթիռում հավանաբար գտնվում է Էդվարդ Սնոուդենը, որին հետախուզում է ԱՄՆ-ը:
Ցուցարարներն այրել են ԱՄՆ-ի, Ֆրանսիայի, Իսպանիայի, Իտալիայի և Պորտուգալիայի դրոշները:
Ակցիայի մասնակիցները ճայթռուկ են նետել ԱՄՆ-ի դեսպանատան շենքի վրա և հակաամերիկյան կարգախոսներ բղավել: Դիվանագիտական առաքելության դռները փակ են եղել:
Ավելի վաղ նախագահ Էվո Մորալեսը լատինաամերիկյան երկրների մի շարք առաջնորդների հետ արտակարգ հանդիպմանը նախազգուշացրել էր, որ կարող է փակել ԱՄՆ-ի դեսպանատունը, որի իշխանություններին նա մեղադրում է եվրոպական երկրների վրա ճնշում գործադրելու մեջ: