Ամիսներ առաջ ստեղծված «Համահայկական բնապահպանական ճակատի» անդամները վերջերս հնգօրյա այց էին կատարել Սյունիքի մարզ, որի նպատակը մարզում առկա բնապահպանական խնդիրները վեր հանելն էր: Այսօր լրագրողների հետ հանդիպմանը ՀԲՃ-ի անդամներ Եղիա Ներսիսյանը, Լևոն Գալստյանը և Սյուզի Պետրոսյանը, ովքեր նոր են վերադարձել Սյունիքի մարզից, պատմեցին, թե ինչ է կատարվում Սյունիքում:
Եղիա Ներսիսյանի խոսով՝ քարտեզին նայելիս նկատում ենք, որ ամեն կետում բնապահպանական խնդիր կա: Նրա հավաստմամբ` մարդիկ այլ ելք չեն տեսնում, այդ պատճառով չեն բարձրաձայնում այդ խնդիրների մասին:
«Երբ զրուցեք մարդկանց հետ, կտեսնեք՝ ինչ սարսափելի դեպքեր են պատմում. այդ միջավայրում ծնվում են առանց ձեռքի երեխաներ, երիտասարդները դառնում են չբեր: Մարդ է մահանում, բերում փողը տալիս են և ծածկում ամեն ինչ»:
Ասուլիսի մյուս բանախոս՝ բնապահպան Լևոն Գալստյանն էլ խոսեց Սյունիքում պոչամբարների անմխիթար վիճակի մասին. «Մենք հինգ օր եղել ենք այնտեղ, հինգ-վեց վթարային դեպքի ենք ականատես եղել: Մեր այցելության ժամանակ մի օր Ողջի գետը վարարեց, և անտանելի հոտ էր գալիս. պարզվեց պոչամբարն է վթարվել»:
Բնապահպանի հավաստմամբ` պոչամբարի կեղտաջրերը միշտ էլ հոսում են գետով, և ոչ մի պատկան մարմին չի ուզում հարցը լուծել. «Եթե այս տեմպերով շարունակենք հանքարդյունաբերությունը, իրականում մենք քսան կամ երեսուն տարի հետո Հայաստանում ապրելու միջավայր չենք ունենա: Պոչամբարների օգտագործման որևէ օրակարգ չկա, անասունները կարող են ջուր խմել, մարդիկ կարող են մտնել պոչամբարի մեջ: Ոչ ոք այդ մարդկանց չի ասում՝ վտանգավոր է, ոչ մի ցուցանակ չկա»:
Բանախոսն ասաց, որ իրենք բարձրաձայնելու են բոլոր խնդիրների մասին, և եթե պատկան մարմինները հարցը չլուծեն, հասարակությունն ինքը կգտնի լուծում:
Ասուլիսին ներկա Սյուզի Պետրոսյանը, ով նոր է վերադարձել Լոս Անջելեսից, զարմացած էր, թե ինչպես է շահագործվում Հայաստանի ընդերքը: Նրա փոխանցմամբ` իրենց դրսում այդ խնդիրների մասին ոչ ոք ոչինչ չի ասում, նա իմացել է այդ խնդիրների մասին, երբ Եղիան Լոս Անջելես է գնացել. «Ես պատրաստ եմ կանգնել բնապահպանների կողքին, որովհետև երբ մեր հողը թունավորվում է, մենք հազար տարով չենք կարող այն օգտագործել: Լինելով Սյունիքում` հասկացա, թե ինչքան անկուշտ են մեր պաշտոնյաները»:
Լուսանկարը՝ PanARMENIAN Photo-ի
