Հուլիսի 7-ից ուժի մեջ մտան գազի ու էլեկտրաէներգիայի բարձրացված սակագները: Այսուհետև նախկին 132 դրամի փոխարեն սպառողը գազի 1 խորանարդ մետրի համար կվճարի 156 դրամ, ինչի հետևանքով էլ էլեկտրաէներգիան կթանկանա 8 դրամով: Նախնական կանխատեսումների համաձայն, բնականաբար, գազի և էլեկտրաէներգիայի թանկացման հետևանքով անխուսափելիորեն կթանկանան նաև պարենային զամբյուղի առաջնային սննդատեսակները, ինչպիսիք են՝ հացամթերքը, կաթնամթերքը և այն սննդատեսակները, որոնց պատրաստման ժամանակ օգտագործվում է գազ և էլեկտրաէներգիա:
ՀՀ «Սպառողների ասոցիացիա»-ի նախագահ Արմեն Պողոսյանի նախնական գնահատականների համաձայն՝ հասարակ քաղաքացու կյանքը կթանկանա 10-20%-ով:
Այսօր առավոտյան «Առաջին լրատվական»-ը շրջայց անցկացրեց Երևանի կենտրոնի մի քանի սուպերմարկետներով՝ պարզելու, թե առաջին անհրաժեշտության ապրանքները թանկացե՞լ են, թե՞ ոչ: Ապրանքների գների ուսումնասիրության արդյունքում պարզ դարձավ, որ կաթնամթերք արտադրող ընկերություններն այսօր կաթնամթերքն առաքել են սուպերմարկետներ այն գներով, ինչ նախորդ երկու ամիսներին:
Ինչպես «Առաջին լրատվական»-ի հետ զրույցում տեղեկացրեց կաթնամթերքի «Բոնիլատ» ընկերության հանրային կապերի պատասխանատու Զարուհին, առայժմ հաշվարկներ չեն իրականացրել, գործընթացը դեռևս ընթացքի մեջ է, ուստի չեն կարող ասել, թե երբ և որքանով կթանկանա իրենց արտադրած կաթնամթերքը:
Այսօր կաթնամթերքի «Մարիաննա» ընկերությունը մի շարք խանութներ կաթնամթերք էր առաքել նույն արժեքով, ինչ նախորդ երկու ամիսներին: Մի շարք այլ ընկերություններ ևս նույն արժեքով են առաքել, ինչ նախկինում: Կարելի է ենթադրել, որ արտադրող ընկերությունները դեռևս հաշվարկներ չեն իրականացրել և չեն թանկացրել իրենց ապրանքը:
Այնինչ բոլորովին այլ է պատկերը հացամթերքի շուկայում: Թեև սուպերմարկետների աշխատակիցները պնդում են, որ այսօր թանկացում չի եղել, գնորդները պնդում են, որ վերջին օրերին՝ շաբաթ օրվանից սկսած, հացը թանկացել է միջինը 20 դրամով, այսինքն՝ նախկինում 150 դրամ արժողությամբ հացն այսօր վաճառվում է 170 դրամով: Սակայն բոլոր հարցարտադրող ընկերությունները չեն, որ թանկացում են կատարել:
Սպառողական զամբյուղի այլ ապրանքների գնային քաղաքականությունը դեռևս չի փոխվել: Սակայն արտադրող ընկերությունները իրենց շահույթը կամ ընկերությունը պահպանելու համար պետք է գնան պարտադրված թանկացումների: Չի կարելի բացառել նաև այն, որ գազի և էլեկտրաէներգիայի թանկացման արդյունքում մի շարք ընկերություններ կօգտվեն բարենպաստ իրադրությունից, կսահմանեն կամայական բարձր գներ, ինչը հատկապես բացասական ազդեցություն կունենա բնակչության խոցելի շերտերի համար:
