Հայաստանի ոստիկանությունը չափազանց մեծ ուժ է գործադրել Երևանում ցուցարարների նկատմամբ և հարձակումներ է գործել ցույցը լուսաբանող լրագրողների վրա: Այս մասին ասվում է Human Rights Watch իրավապաշտպան կազմակերպության երեքշաբթի տարածած հայտարարության մեջ:
Կազմակերպությունը նշում է, որ ոստիկանները ծեծել են լրագրողներին և ցուցարարներին, նաև ձերբակալել են տասնյակ մարդկանց:
«Հայաստանում պետք է անցկացվի հուլիսի 29-ին ցուցարարների վրա ոստիկանական հարձակումների անհապաղ և համապարփակ հետաքննություն: Թեև ոստիկանությունը պարտավոր է պահպանել հասարակական կարգը, նրան քարտ-բլանշ չի տրվում բռնություն կիրառելու նրանց հանդեպ, ովքեր խաղաղ հավաքվել են իրենց տեսակետը հայտնելու»,- հայտարարել է Հարավային Կովկասի հարցերով կազմակերպության տնօրեն Գեորգի Գոգիան:
Կազմակերպությունում նշում են, որ խոսել են տուժածների և վկաների հետ: Կազմակերպության ներկայացուցիչները նաև այցելել են հիվանդանոցում գտնվող մի քանի վիրավոր լրագրողների և ցուցարարների: Հարցվածները հայտնել են, որ հավաքվածները չեն փորձել ճեղքել շղթան, երբ ոստիկանությունը սկսել է լուսաձայնային նռնակներ կիրառել: Human Rights Watch-ի ուսումնասիրած դեպքերի տեսագրությունը հաստատում է վկաների ցուցմունքները՝ հայտնել են կազմակերպությունում:
Գոգիայի համոզմամբ՝ ոստիկանությունը կարող էր օրինականորեն փորձել կանխել ցուցարարների հասանելիությունը ՊՊԾ գրավված գնդին մոտ տարածքին և պարտավոր էր պահպանել մարդու իրավունքները և հարգել ուժի կիրառման չափանիշները: «Ոստիկանությունը չպետք է խանգարի լրագրողների օրինական աշխատանքին՝ էլ չասած նրանց աշխատանքի վայրում հարձակումների և պատիժների մասին»,- նշել է Գոգիան:
