Պետական ծառայողների կրճատումների դեմ ցույցի ժամանակ՝ հուլիսի 7-ի երեկոյան, հարձակում է իրականացվել Աթենքի քաղաքապետ Յորգոս Կամինիսի դեմ: Այս մասին հայտնում է France-Presse գործակալությունը՝ հղում անելով քաղաքապետարանի մամլո ծառայությանը: Կամինիսին հետազոտման նպատակով տեղափոխել են հիվանդանոց: Նա լուրջ վնասվածքներ չի ստացել:
Անհայտ անձինք նրա վրա են հարձակվել, երբ նա փողոց է դուրս եկել հունական այլ քաղաքների քաղաքապետերի հետ բանակցություններից հետո: Նրանք հավաքվել էին՝ քննարկելու մունիցիպալ աշխատողների կրճատման ծրագիրը, որը հավանության էր արժանացվել կառավարության կողմից:
Միևնույն ժամանակ Աթենքի քաղաքապետարանի շենքի մոտ անցկացվել է քաղաքապետարանի աշխատողների արհմիության ցույցը:
Քաղաքի իշխանությունները հարձակման մեջ մեղադրել են ցուցարարներին՝ հայտարարելով, որ արհմիությունը նրանց վտանգավոր ուղով է տարել: Արհմիության անդամներն իրենց հերթին հայտարարել են, որ հարձակումը սադրանք է եղել:
Հունաստանը պատրաստվում է մոտ 25 հազար պետական ծառայող հեռացնել աշխատանքից, ընդ որում՝ 4000-ին՝ մինչև տարեվերջ:
