Սիրիական ընդդիմությունը նախագահ Բաշար Ասադին առաջարկում է Հոմս քաղաքում դադարեցնել մարտական գործողությունները Ռամադանի ժամանակ: Այս մասին Reuters գործակալության հետ զրույցում ասել է Սիրիայի ընդդիմադիր և հեղափոխական ուժերի ազգային կոալիցիայի ղեկավար Ահմադ Ջաբրան:
Ժամանակավոր զինադադարի վերաբերյալ այլ մանրամասներ նա չի հայտնել: 2013-ին մուսուլմանների համար սուրբ ամիս Ռամադանը կտևի հուլիսի 9-ից օգոստոսի 7-ը:
Կառավարական զորքերը լիբանանյան «Հըզբոլլահ» շարժման աջակցությամբ հուլիսի սկզբից իրականացնում են Հոմսից ապստամբներին դուրս մղելու օպերացիա: Սիրիական ընդդիմության փոխանցմամբ՝ կառավարական զորքերը քաղաքին ավիահարվածներ են հասցնում:
Բացի այդ, Ահմադ Ջաբրան հայտարարել է, որ սիրիական ընդդիմությունը ակնկալում է մոտ ժամանակներս Սաուդյան Արաբիայից ժամանակակից զենք ստանալ, որը ապստամբներին թույլ կտա բարեհաջող դիմակայել կառավարական զորքերին: Մինչև ապստամբները պատշաճ կերպով զինված չլինեն՝ ընդդիմությունը մտադիր չէ մասնակցել ժնևյան համաժողովին՝ ընդգծել է նա: Հիշեցնենք, որ համաժողովի նախապատրաստմամբ զբաղվում են Ռուսաստանն ու ԱՄՆ-ը:
Նշենք, որ Սաուդյան Արաբիայի իշխանությունների հետ սերտ կապեր ունեցող Ջաբրան Ազգային կոալիցիայի ղեկավարի պաշտոնում ընտրվել է հուլիսի 6-ին: Սա նրա առաջին հարցազրույցն էր:
