Բրիտանական իշխանություններն ավարտին են հասցնում ծայրահեղական իսլամիստ քարոզիչ Աբու Կատադայի արտահանձնման նախապատրաստությունները։ Այս մասին հաղորդում են բրիտանական լրատվամիջոցները:
Ինչպես նախատեսվում է, նա կհանձնվի Հորդանանին կիրակի օրը: Իսլամիստ քաղաքական գործիչը Հորդանանում հեռակա կարգով դատապարտվել է ցմահ ազատազրկման: Նա ձերբակալվել է Մեծ Բրիտանիայում՝ Հորդանանի արտահանձման հայցով։
Այս ամենը տեղի է ունենում չնայած այն բանին, որ 2012 թ. հունվարին Մարդու իրավունքների եվրոպական դատարանն արգելել էր Հորդանանին կալանավորի արտահանձնումը, քանի որ նրա նկատմամբ կարող են օգտագործվել բռնի կերպով ձեռք բերված վկայություններ:
Ինչպես նշում է Times թերթը, արդեն շաբաթ երեկոյան 53-ամյա քարոզչին կտեղափոխեն Բելմարշի հատուկ ռեժիմի բանտից Northolt ավիաբազա, որը բրիտանական մայրաքաղաքից դեպի հյուսիս-արևելք 40 կմ հեռավորության վրա է գտնվում:
