ԵԱՀԿ խորհրդարանական վեհաժողովի դիտորդական առաքելության այցն Ադրբեջան հարցականի տակ է այն պատճառով, որ կառույցի աշնանային նստաշրջանը, որը տեղի է ունենալու Չեռնոգորիայում, համընկնում է Ադրբեջանի նախագահական ընտրություններին:
Ինչպես հաղորդում է APA գործակալությունը, այս մասին հայտարարել է Ադրբեջանի խորհրդարանի փոխխոսնակ, ԵԱՀԿ ԽՎ-ում ադրբեջանական պատվիրակության ղեկավար Բահար Մուրադովան:
Նա նշել է, որ չնայած դրան, ԵԱՀԿ ԽՎ ամառային նստաշրջանում ադրբեջանական պատվիրակության ղեկավարությունը ուղերձով դիմել է ինչպես կառույցի գլխավոր քարտուղարին, այնպես էլ մշտական կոմիտեի անդամներին:
«Նշվել է, որ Ադրբեջան դիտորդական առաքելություն ուղարկելը, որը կհետևի ընտրությունների ընթացքին, կարևոր է, և այս կապակցությամբ մենք հրավիրեցինք նրանց: Ներկա պահին մենք բանավոր հրավերք ենք կատարել նախագահական ընտրությունների օրը պաշտոնապես հայտարարելուց հետո, այնուհետև Միլի Մեջլիսի անունից նրանց գրավոր կհրավիրենք ընտրություններին հետևելու համար»,- ասել է նա:
