Երևանի պետական համալսարանի Քաղաքական ինստիտուտների և գործընթացների ամբիոնի վարիչ Գարիկ Քեռյանը «Առաջին լրատվական»-ի հետ զրույցում ներկայացնելով իր դիտարկումները երևանյան վերջին զարգացումների վերաբերյալ՝ ասաց. «Հուլիսի 17-ից ստեղծված իրավիճակը բավականին յուրօրինակ և յուրահատուկ է. մեր 25-ամյա անկախության շրջանում մենք երբևէ նման իրադարձության առջև չենք կանգնել: Այնուամենայնիվ, տեղի ունեցածը ԱԱԾ-ի և ոստիկանության պրոֆեսիոնալիզմի բացակայության հետևանք էր»:
Նրա խոսքով՝ սա անսպասելի էր բոլորի համար՝ և՛ իշխանության, և՛ հասարակության, և դժվար է տալ միանշանակ գնահատական. «Իհարկե, դասական իմաստով սա ահաբեկչություն է, սակայն միաժամանակ մենք գործ չունենք ահաբեկիչների, քրեական տարրերի հետ»:
Մեր զրուցակիցը կարծում է, որ այս դեպքերից հետո մեր հասարակությունը ծայրահեղ բևեռացավ, և չեղավ միջին գիծ տանող, ավելի սառը մոտեցում ցուցաբերող որոշակի քաղաքական դիրքորոշում:
Պարոն Քեռյանը չի կիսում այն կարծիքը, թե սպառվել էին պայքարի քաղաքական մեթոդները. «Մի՞թե հնարավոր չէր, որ «Նախախորհրդարանը» մասնակցեր 2017-ի ընտրություններին (մանավանդ շատ քիչ ժամանակ էր մնացել) և տեսներ, թե իրականում որքան ընտրազանգված ունի»:
Դիտարկմանը՝ սա քաղաքական շանտաժի ձև չէ՞ արդյոք, քանի որ այս գործիչները այն, ինչ չկարողացան անել խոսքի միջոցով (ունենալ մեծ թվով հետևորդներ), կարողացան դրան հասնել զենքի միջոցով, Գարիկ Քեռյանը արձագանքեց. «Այստեղ կիրառվել է շատ նուրբ քաղաքական տեխնոլոգիա: Նրանց հաշվարկը կատարվել է հետևյալի վրա. կան սոցիալ-տնտեսական բարդ խնդիրներ, և կիրառվեց այդ դժգոհության օգտագործման տեխնոլոգիան: Այս քայլին դիմողները հույս ունեին, որ կայծից բոց կբռնկվի և տարբեր պատճառներով դժգոհ լայն զանգվածներին հրավիրելու հարթակ կստեղծվի»:
Քաղաքագետը չի արդարացնում այս քայլը, քանի որ այժմ Հայաստանը կանգնած է բավականին բարդ միջազգային քաղաքական իրադրության առջև. «Ի վերջո՝ իշխանությունների հեռացման պահանջ դնող քաղաքական ուժը պետք է ունենա իր ծրագիրը, իշխանությանը փոխարինող իր թիմը և այդ թիմի կողմից այս հարցերը լուծելու գործողություններ»:
Ինչպես նկատեց մեր զրուցակիցը՝ այդ շարժման պահանջները անընդհատ փոխվեցին, և այժմ շարժումը բոլորովին այլ հունով է գնում:
Անդրադառնալով այս թնջուկը լուծելու հարցում իշխանությունների կողմից պահպանվող լռությանը և ԱԺ արտահերթ նստաշրջան հրավիրելու Նիկոլ Փաշինյանի նախաձեռնության ձախողմանը՝ քաղաքագետն ասաց. «Ես, իհարկե, չեմ արդարացնում քաղաքական գործիչների լռությունը, սակայն արդարացնում եմ հարցը ԱԺ նիստում քննարկման առարկա չդարձնելը. ես ենթադրում եմ, որ դա հարցը չքաղաքականացնելուն ուղղված քայլ էր»:
Ինչ վերաբերում է ստեղծված իրավիճակի հանգուցալուծմանը, Գարիկ Քեռյանը շատ բարձր գնահատեց այս հարցում իշխանությունների զսպվածությունը:
