Ուրբաթ օրը Եգիպտոսում նախկին նախագահ Մուհամմադ Մուրսիի կողմնակիցների ու հակառակորդների միջև տեղի ունեցած բախումների ժամանակ զոհվել է ավելի քան 30 մարդ: Այս մասին հայտնում են եգիպտական ԶԼՄ-ները՝ հղում անելով երկրի բժշկական ծառայությունների ներկայացուցիչներին:
Առավել կատաղի ընդհարումներ են տեղի ունեցել Կահիրեի կենտրոնում և քաղաքի մի շարք այլ շրջաններում, որտեղ ընդհանուր առմամբ զոհվել է 7 մարդ: Կատաղի են եղել բախումները նաև երկրի հյուսիսային մայրաքաղաք Ալեքսանդրիայում, որտեղ Սիդի-Ջաբեր թաղամասում իսլամիստների կողմնակիցներն ու հակառակորդները հաշիվներ են պարզել 8 ժամ: Այնտեղ քարերից ու Մոլոտովյան կոկտեյլներից բացի՝ կիրառվել է նաև հրազեն: Զոհվել է 14 մարդ: Մոտ 500 մարդ վիրավորվել է:
Բախումները շարունակվել են այնքան ժամանակ, քանի դեռ բանակը չի միջամտել: Ներկայում զինվորականների կողմից ձերբակալվել է մոտ 150 մարդ: Փնտրվում են իսլամիստների կողմնակիցները, որոնք նկատվել են մոտակա շենքերի տանիքներին, որտեղից ցուցարարների վրա կրակ է բացվել:
Ուրբաթ օրն անհանգիստ է եղել նաև Սուեզում, Լուքսորում և այլ քաղաքներում: Իսմայիլիայում զոհվել է 1, վիրավորել 20 մարդ: Սուեզում նույնպես մեկ մարդ է զոհվել: Նա Մուրսիի կողմնակիցներից էր:
Սինայի թերակղզու հյուսիսում նախկին նախագահին աջակցող իսլամիստ գրոհայինների հարձակման զոհ են դարձել 5 ոստիկան և 1 զինծառայող:
