Իրանական Tasnim լրատվական գործակալության փոխանցմամբ՝ Իրանը վրացական գնորդներից մեկի հետ ստորագրել է փորձնական պայմանագիր, որի համաձայն՝ 2016 թվականին Հայաստանին մատակարարվող իրանական գազի ոչ մեծ խմբաքանակ նրա տարածքով կուղարկվի Վրաստան:
Այդ մասին այսօր Թեհրանում Հայաստանի էներգետիկայի և բնական պաշարների նախարար Լևոն Յոլյանի հետ հանդիպումից հետո լրագրողների հետ զրույցում հայտարարել է Իրանի նավթարդյունաբերության նախարար Բիժան Նամդար Զանգանեն:
Նրա խոսքով՝ Իրանը հուսով է, որ Հայաստանի տարածքով Վրաստանին գազ մատակարարելու փորձնական գործարքը կիրագործվի մինչև հաջորդ մարտ (իրանական օրացուցային տարվա ավարտը):
Ավելի վաղ՝ հուլիսին, էներգետիկ ոլորտը ներկայացնող իրանցի պաշտոնյաներից մեկը հայտարարել է, որ Վրաստան գազ արտահանելու նախագիծը կիրագործվի երկու ամսում:
Զանգանեի խոսքով՝ եռապատկվելու է Հայաստանին մատակարարվող իրանական գազի ծավալը՝ օրական 1 միլիոն խորանարդ մետրից հասցվելով 3.5 միլիոն խորանարդ մետրի: Զանգանեն հայտարարել է, որ դա տեղի է ունենալու մինչև 2018 թվականի ավարտը: