Այսօր ԱՄՆ-ը տոնում է Անկախության 237-ամյակը:
«Մենք ակնհայտ ճշմարտություն ենք համարում այն, որ բոլոր մարդիկ ստեղծված են հավասար և Արարչի կողմից օժտված են որոշակի անքակտելի իրավունքներով, որոնց թվին է դասվում կյանքի, ազատության և երջանկության ձգտման իրավունքը»,- ասվում է ողջ աշխարհում պատմական փաստաթուղթ դարձած Անկախության հռչակագրի նախաբանում:
ԱՄՆ նախագահ Բարաք Օբաման շնորհավորել է հայրենակիցներին Անկախության օրվա առթիվ: Նա հարգանքի տուրք է մատուցել ամերիկացիների շատ սերունդների՝ ֆերմերներից և ուսուցիչներից մինչև ձեռնարկատերեր, որոնց շնորհիվ ԱՄՆ-ը վերածվել է այնպիսի երկրի, ինչպիսին է այսօր:
Նախագահը հիշեցրել է, որ առաջին ամերիկացիները պայքարել են հեղափոխության համար, և միայն քչերն են հավատացել հաղթանակին:
«Եվ այսօր՝ 237 տարի անց, ԱՄՆ-ը անհավանական երկիր է, հանդիսանում է խոշորագույնն աշխարհում, ազատության և հնարավորությունների երկիր է, խաղաղության ու ազատության գլոբալ պաշտպան, հույսի շող բոլոր մարդկանց համար, որոնց համար թանկ են այդ գաղափարները»,- ասել է Օբաման՝ փոխանցում է «Ամերիկայի ձայնը»:
Իր ուղերձում Օբաման երախտագիտություն է հայտնել ամերիկացի զինծառայողներին, ովքեր, նրա խոսքով՝ կարևոր դեր են խաղացել ազգի պատմության մեջ:
Նշենք, որ անցած տարի ԱՄՆ արևելյան ափին հարվածած «Սենդի» փոթորկից հետո Նյու Յորքում առաջին անգամ հանրության համար կրկին բացվել է Ազատության արձանը:
